हवाई जहाजबाट आफूलाई जबरजस्ती निकालिएको भन्दै अमेरिकामा एक वृद्धाले एयरलाइन्स कम्पनीविरुद्ध उजुरी दिएकी छिन् ।
अमेरिकास्थित साउथवेस्ट एयरलाइन्सविरुद्ध ६८ वर्षीय फ्लोरिडा निवासी मेडोरा क्ले रिडिङले एक करोड अमेरिकी डलर जरिवानासहित मुद्दा दायर गरेकी हुन् ।
आफूले पानी पिउन केहीबेरका लागि मात्र मास्क खोलेको भएपनि एयरलाइन्सका कर्मचारीले मास्क नै प्रयोग नगरी कुराकानीको आरोप लगाउँदै जहाजबाट ओर्लन बाध्य पारिएको वृद्धाले बताएकी छिन् ।
‘मेरो मुटुको अवस्था र ब्लड सुगरको मात्रा कम रहेकाले शरीरलाई पानीको आवश्यकता परिरहन्छ’ अदालतमा बयान दिँदै उनले भनेकी छिन्, ‘सबै कारण खुलाएर मेरो स्वास्थ्य अवस्थाको रिपोर्ट देखाउँदा पनि एयरलाइन्सका कर्मचारीले मलाई जबरजस्ती प्लेनबाट ओर्लन बाध्य पारे ।’
रिडिङका अनुसार उनी जनवरी ७ तारिखमा वासिङ्गटन डि.सीबाट फ्लोरिडा आउन जहाज चढेकी थिइन् ।
अदालतले एयरलाइन्सलाई दोषी देखाउँदै एक करोड अमेरिकी डलर क्षतिपूर्ति रिडिङलाई दिन आदेश दिए पनि हालसम्म साउथवेस्ट एयरलाइन्सले आफ्नो धारणा सार्वजनिक गरेको छैन ।
