नेपाल भ्रमणमा रहेका भारतका विदेश सचिव विक्रम मिस्रीले आज बिहीबार प्रधानमन्त्री बालेन्द्र शाहसँग भेटवार्ता गर्ने भएका छन् । भेटमा प्रधानमन्त्री शाहको सम्भावित भारत भ्रमणको तयारी र भ्रमणका क्रममा उठाइने एजेन्डाबारे छलफल हुने अपेक्षा गरिएको छ ।
परराष्ट्र सचिव अमृत राईको निमन्त्रणामा नेपाल आएका मिस्रीले बुधबार नेपाल सरकारका विभिन्न मन्त्रीहरूसँग छुट्टाछुट्टै भेटवार्ता गरेका थिए । ती भेटमा नेपाल–भारतबीचको द्विपक्षीय सम्बन्ध, सहकार्यका सम्भावित क्षेत्र र आगामी भ्रमणका क्रममा छलफल गर्न सकिने विषयमा कुराकानी भएको थियो ।
प्रधानमन्त्री शाहको भारत भ्रमणको तयारीलाई अघि बढाउने उद्देश्यले भारतीय विदेश सचिव नेपाल आएको बताइएको छ । यद्यपि प्रधानमन्त्रीको भारत भ्रमणको मिति भने अहिलेसम्म सार्वजनिक गरिएको छैन ।
प्रधानमन्त्रीसँगको भेटवार्ता सम्पन्न गरेपछि मिस्री आजै अपराह्न भारत फर्किने कार्यतालिका रहेको छ ।
