काठमाडौं । नेपाल कम्युनिष्ट पार्टी (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ पाँचदिने श्रीलंका भ्रमण सम्पन्न गरी आइतबार स्वदेश फर्किएका छन्।
भ्रमणका क्रममा प्रचण्डले इन्टरनेशनल पिपुल्स एसेम्बलीद्वारा आयोजित ‘ह्यान्ड्स अफ एसिया’ अन्तर्राष्ट्रिय सम्मेलन मा प्रमुख वक्ताका रूपमा उद्घाटन र समापन सत्रलाई सम्बोधन गरेका थिए। उनले विश्व राजनीति, दक्षिण एशियाली जनआन्दोलन, समाजवादको भविष्य तथा प्रगतिशील शक्तिबीच सहकार्यको आवश्यकताबारे धारणा राखेका थिए।
प्रचण्डले ग्लोबल साउथ एकेडेमिक फोरम लाई दिएको विशेष अन्तर्वार्तामा नेपालको शान्ति प्रक्रिया, जनयुद्धबाट लोकतान्त्रिक गणतन्त्रसम्मको यात्रा, वामपन्थी आन्दोलनका चुनौती र समाजवादी रूपान्तरणबारे आफ्नो दृष्टिकोण प्रस्तुत गरेका थिए।
श्रीलंका बसाइका क्रममा उनले त्यहाँको कम्युनिस्ट पार्टी तथा सत्तारुढ जनता विमुक्ति पेरामुना (JVP) का शीर्ष नेताहरूसँग भेटवार्ता गर्दै दुई देशका कम्युनिस्ट आन्दोलन, लोकतान्त्रिक अभ्यास, आर्थिक विकास, सुशासन र दक्षिण एशियाली वामपन्थी सहकार्यका विषयमा छलफल गरेका थिए।
भ्रमणका क्रममा विभिन्न देशका राजनीतिक दलका नेता, सामाजिक अभियन्ता, अनुसन्धानकर्ता तथा प्रगतिशील बौद्धिक व्यक्तित्वसँग पनि भेटघाट भएको पार्टीले जनाएको छ।
पार्टीका अनुसार श्रीलंका भ्रमणले नेपालको कम्युनिस्ट आन्दोलनका अनुभव अन्तर्राष्ट्रिय मञ्चमा प्रस्तुत गर्नुका साथै दक्षिण एशियाली वामपन्थी शक्तिबीच राजनीतिक सम्बन्ध विस्तार गर्न महत्वपूर्ण योगदान पुर्याएको छ। प्रचण्ड आइतबार बिहान काठमाडौं आइपुगेका हुन्।
