देवानगन्ज । सुनसरीको देवानगन्ज गाउँपालिका पूर्ण खोप सुनिश्चितता पालिकाका रूपमा घोषित भएको छ । गाउँपालिका परिसरमा सोमबार आयोजित एक कार्यक्रमबीच पालिकालाई पूर्ण खोप सुनिश्चितता पालिका घोषणा गरिएको हो ।
गाउँपालिकाभित्रका लक्षित सबै बालबालिकाले राष्ट्रिय खोप कार्यक्रमअन्तर्गत तोकिएका सबै खोप प्राप्त गरेको सुनिश्चित भएपछि पालिकालाई पूर्ण खोप सुनिश्चितता पालिका घोषणा गरिएको स्वास्थ्य शाखाले जनाएको छ ।
कार्यक्रममा गाउँपालिका अध्यक्ष बेचनप्रसाद मेहताले पूर्ण खोप सुनिश्चितता कायम राख्नु स्थानीय सरकारको साझा जिम्मेवारी भएको बताउँदै आगामी दिनमा पनि कुनै पनि बालबालिका खोप सेवाबाट वञ्चित हुन नदिने प्रतिबद्धता व्यक्त गरे ।
कार्यक्रममा प्रमुख प्रशासकीय अधिकृत महेशकुमार ठाकुर, स्वास्थ्य कार्यालय सुनसरीका प्रमुख सतीशकुमार ठाकुर, स्वास्थ्य कार्यालयका फोकल पर्सन कन्हैया कुमार साह, गाउँपालिकाका स्वास्थ्य शाखा प्रमुख कृत्यानन्द यादव तथा पालिकाभरिका ७६ जना महिला स्वास्थ्य स्वयंसेविकाको सहभागिता रहेको थियो ।
स्वास्थ्य शाखा प्रमुख यादवले पूर्ण खोप सुनिश्चितता अभियान सफल बनाउन महिला स्वास्थ्य स्वयंसेविकाले घरदैलो स्तरसम्म पुगेर महत्वपूर्ण भूमिका निर्वाह गरेको बताए । कार्यक्रममा खोप अभियानमा योगदान पुर्याउने स्वास्थ्यकर्मी, महिला स्वास्थ्य स्वयंसेविका तथा सरोकारवालाहरूको योगदानको समेत प्रशंसा गरिएको थियो ।
