विराटनगर । फिफा विश्वकप–२०२६ को समूह ‘सी’ मा स्कटल्यान्डले विजयी सुरुआत गर्दै नकआउट चरणको सम्भावनालाई बलियो बनाएको छ । हाइटीलाई १–० ले पराजित गरेपछि स्कटल्यान्डले महत्वपूर्ण तीन अंक जोडेको हो, जसले समूहको समीकरणलाई थप रोचक बनाएको छ ।
गिलेट स्टेडियममा आइतबार भएको प्रतिस्पर्धात्मक खेलमा स्कटल्यान्डका लागि कप्तान जोन म्याकगिनले २८औँ मिनेटमा गरेको गोल नै निर्णायक बन्यो । चे एडम्सको प्रहार गोलरक्षक जोह्नी प्लासिडले रोके पनि रिबाउन्डमा म्याकगिनले बललाई जाली चुमाउँदै टोलीलाई अग्रता दिलाएका थिए । त्यसपछि हाइटीले बराबरीका लागि लगातार प्रयास गरे पनि स्कटल्यान्डको रक्षापंक्तिले दबाब झेल्दै तीन अंक सुरक्षित गर्यो ।
यो जितसँगै स्कटल्यान्डले ३६ वर्षपछि विश्वकपमा पहिलो जित दर्ता गरेको छ । लामो समयपछि विश्वकपमा फर्किएको टोलीका लागि यो नतिजाले आत्मविश्वास बढाएको छ भने समूहको शीर्ष स्थानमा उक्लिने अवसर पनि दिएको छ ।
यसअघि भएको अर्को खेलमा पाँच पटकको विश्वविजेता ब्राजिल मोरक्कोसँग १–१ को बराबरीमा रोकिएको थियो । मोरक्कोले इस्माइल सैबारीको गोलबाट अग्रता लिए पनि भिनिसियस जुनियरले शानदार गोल गर्दै ब्राजिललाई हारबाट जोगाएका थिए । तर स्पष्ट दाबेदार मानिएको टोलीले पूरा तीन अंक जोड्न नसक्दा समूहको प्रतिस्पर्धा खुला बनेको छ ।
पहिलो चरणका खेल सकिँदा स्कटल्यान्ड ३ अंकसहित शीर्ष स्थानमा पुगेको छ भने ब्राजिल र मोरक्को समान १–१ अंकसहित पछाडि छन् । हाइटी अंकविहीन रहँदा समूह ‘सी’ को अर्को चरणका खेल झन् निर्णायक बन्ने देखिएको छ ।
अब स्कटल्यान्डले मोरक्कोसँग प्रतिस्पर्धा गर्नेछ भने दबाबमा परेको ब्राजिलले हाइटीविरुद्ध जित निकाल्नै पर्ने अवस्था सिर्जना भएको छ ।
