विराटनगर । ‘जेनजी सरकार, जेनजी डाक्टरलाई न्याय दे’ भन्ने नारासहित इन्टर्न तथा आवासीय चिकित्सकहरूले काठमाडौंको माइतीघर मण्डलामा प्रदर्शन गरेका छन्।
उनीहरूले लामो कार्यघण्टा, न्यून पारिश्रमिक तथा सेवा–सुविधामा देखिएको असमानता अन्त्य गर्न सरकारको ध्यानाकर्षण गराएका हुन्।
प्रदर्शनमा विभिन्न मेडिकल कलेजमा कार्यरत चिकित्सकहरूले ७ बुँदे माग अघि सारेका छन्। उनीहरूले प्रशिक्षार्थी चिकित्सकहरूलाई अत्यधिक समय काम गर्न बाध्य पारिएको, श्रम ऐनअनुसारको सेवा–सुविधा नपाइएको तथा प्रशिक्षणका क्रममा विभिन्न समस्या भोग्नुपरेको बताएका छन्।
चिकित्सकहरूले श्रम शोषण अन्त्य गर्दै सुरक्षित र सम्मानजनक कार्य वातावरण सुनिश्चित गर्नुपर्ने माग गरेका छन्। साथै, बजेटमार्फत बढाइएको तलब कार्यान्वयन गर्दै आवासीय चिकित्सकलाई अधिकृत आठौँ तह सरहको तलब साउन महिनादेखि उपलब्ध गराउनुपर्ने उनीहरूको माग छ।
त्यस्तै, सातामा ४८ घण्टाभन्दा बढी काम गराए श्रम ऐनअनुसार अतिरिक्त समयको भत्ता दिनुपर्ने, सुत्केरी बिदा तथा मानसिक स्वास्थ्यसम्बन्धी व्यवस्था सुधार गर्नुपर्ने लगायतका माग पनि प्रदर्शनकारीहरूले उठाएका छन्।
प्रदर्शनकारी चिकित्सकहरूले सरकारलाई तत्काल माग सम्बोधन गर्न दबाब दिँदै चिकित्सा क्षेत्रमा देखिएको संरचनागत समस्या समाधान गर्न आग्रह गरेका छन्।
