एजेन्सी । फिफा विश्वकप २०२६ को उद्घाटन खेलमा आयोजक राष्ट्र मेक्सिकोले दक्षिण अफ्रिकालाई २–० गोल अन्तरले पराजित गर्दै प्रतियोगिताको विजयी सुरुआत गरेको छ ।
ऐतिहासिक अज्टेका स्टेडियममा सम्पन्न खेलमा जुलियन किनोनेस र राउल जिमेनेजले गोल गर्दै मेक्सिकोलाई महत्वपूर्ण तीन अंक दिलाए ।
खेलको नवौं मिनेटमै जुलियन किनोनेसले गोल गर्दै घरेलु टोलीलाई अग्रता दिलाएका थिए । पहिलो हाफभरि मेक्सिकोले खेलमा पूर्ण नियन्त्रण राख्दै दक्षिण अफ्रिकामाथि लगातार दबाब सिर्जना गरेको थियो । दोस्रो हाफमा राउल जिमेनेजले अर्को गोल थपेपछि मेक्सिको २–० ले अघि बढ्यो र अन्तिमसम्म यही नतिजा कायम रह्यो ।
उद्घाटन खेल निकै तनावपूर्ण र प्रतिस्पर्धात्मक बनेको थियो । खेलमा कुल तीनवटा रातो कार्ड देखाइयो, जुन विश्वकप उद्घाटन खेलको इतिहासमै दुर्लभ घटना मानिएको छ ।
मेक्सिकोका कप्तान सिजर मोन्टेससहित दुवै टोलीका खेलाडीहरू रातो कार्डको कारबाहीमा परेपछि खेल थप नाटकीय बनेको थियो । अन्त्यतिर मेक्सिको १० खेलाडीमा सीमित भए पनि जित जोगाउन सफल रह्यो ।
यसअघि भव्य उद्घाटन समारोहमार्फत विश्व फुटबलको महाकुम्भको सुरुआत गरिएको थियो । मेक्सिकोको सांस्कृतिक झल्को प्रस्तुत गरिएको समारोहमा विश्वप्रसिद्ध गायिका साकिरा र नाइजेरियाली कलाकार बुर्ना ब्वाइले आधिकारिक गीत ‘दाइ दाइ’ प्रस्तुत गरेका थिए ।
साथै मना, जे बाल्भिन, बेलिन्डा र अलेजान्द्रो फर्नान्डेजलगायत कलाकारहरूको प्रस्तुति, आतिशबाजी र सांस्कृतिक नृत्यले अज्टेका रंगशालालाई उत्सवमय बनाएको थियो ।
मेक्सिको, अमेरिका र क्यानडाले संयुक्त रूपमा आयोजना गरेको यो विश्वकप इतिहासकै सबैभन्दा ठूलो संस्करण हो, जसमा ४८ राष्ट्र सहभागी छन् । उद्घाटन खेलमा जित निकाल्दै मेक्सिकोले समूह ‘ए’ मा सुखद सुरुआत गरेको छ र अब उसको ध्यान दोस्रो खेलतर्फ केन्द्रित हुनेछ ।
