प्रधानमन्त्रीको सीमा सम्बन्धी अभिव्यक्ति राष्ट्रघाती भएको हर्क साम्पाङको आरोप

काठमाडौं । हर्कराज राई (हर्क साम्पाङ)ले देशको भूगोलभन्दा ठूलो कुनै विकासे कामकाज हुन नसक्ने भन्दै राष्ट्रिय सार्वभौमसत्ता सबैभन्दा माथि रहने बताएका छन्। विज्ञप्ति जारी गर्दै उनले दशकौँदेखि नेपालको सीमा भारतले मिच्दै आएको दाबी गर्दै प्रधानमन्त्रीको पछिल्लो अभिव्यक्तिप्रति आपत्ति जनाएका छन्।

‘सार्वभौमसत्ताभन्दा ठूलो कुनै विषय बन्न सक्दैन, बन्नु हुँदैन। यथार्थमा दशकौँदेखि हाम्रो सिमाना भारतले मिच्दै आइरहेको छ,’ विज्ञप्तिमा उल्लेख गर्दै उनले प्रधानमन्त्रीले ‘नेपालले पनि धेरै ठाउँमा भारतको सीमा मिचेको छ’ भनेको अभिव्यक्ति राष्ट्रघाती र तथ्यहीन भएको आरोप लगाएका छन्। यस्तो अभिव्यक्तिले नेपालको राष्ट्रिय स्वाभिमानमा आघात पुगेको उनको भनाइ छ।

यसै विषयमा प्रधानमन्त्रीले आफ्नो भनाइ सच्याउनुपर्ने माग राख्दै आफूहरूले बुधबार संसद्मा विरोध जनाएको पनि साम्पाङले स्मरण गराएका छन्।

उनले शिशिर खनालले प्रधानमन्त्रीको अभिव्यक्तिबारे स्पष्टीकरण दिने क्रममा श्रम संस्कृति पार्टीको असहमति र विरोधलाई बेवास्ता गरिएको आरोप लगाएका छन्।

‘लोकतान्त्रिक संसदीय व्यवस्थाको अभ्यासमा कलंक पोतिएको छ। यो अत्यन्तै निन्दनीय व्यवहारको हामी घोर भर्त्सना गर्दछौँ,’ विज्ञप्तिमा उल्लेख गरिएको छ।

संसदको मर्यादा र गरिमा दिनप्रतिदिन खस्कँदै गएको दाबी गर्दै साम्पाङले यसको प्रमुख कारण सभामुखको कमजोरी रहेको आरोप समेत लगाएका छन्।