विराटनगर । वीरगन्ज महानगरपालिकाका मेयर राजेशमान सिंह निलम्बनमा परेका छन्।
सोमबार अख्तियार दुरुपयोग अनुसन्धान आयोगले उनीविरुद्ध विशेष अदालत, काठमाडौंमा भ्रष्टाचार मुद्दा दायर गरेसँगै उनी स्वतः निलम्बनमा परेका हुन्।
अख्तियारले सिंहले अर्काकी छोरीलाई आफ्नै छोरीका रूपमा देखाई झुटा विवरणका आधारमा नागरिकता दिलाएको ठहर गर्दै मुद्दा दायर गरेको जनाएको छ।
कानुनी व्यवस्थाअनुसार भ्रष्टाचार मुद्दा दर्ता भएपछि सार्वजनिक पद धारण गरेका व्यक्ति स्वतः निलम्बनमा पर्ने व्यवस्था छ।
अख्तियारका अनुसार सिंहले रिता भट्टराईकी छोरीलाई आफ्नै छोरी रुविना श्रेष्ठका रूपमा कायम गरी नागरिकता दिलाएका थिए।
यस प्रक्रियामा वीरगन्ज महानगरपालिकाका तत्कालीन कर्मचारी, जिल्ला प्रशासन कार्यालयका कर्मचारी तथा गृह मन्त्रालयको छानबिन समितिका सदस्यहरूको समेत मिलेमतो रहेको आरोप लगाइएको छ।
अनुसन्धानका क्रममा सिंहले ‘रुविना श्रेष्ठ’ को जन्मदर्ता बनाउन स्वयं सूचक बनेर वि.सं. २०७१ कात्तिक २० गते वीरगन्ज महानगरपालिका-३ को वडा कार्यालयमा फाराम भरेको खुलेको छ।
सोही जन्मदर्ताका आधारमा वि.सं. २०७५ साउन १३ गते जिल्ला प्रशासन कार्यालय पर्सा बाट नागरिकता जारी गरिएको अख्तियारले जनाएको छ।
यस्तै, नागरिकता प्रकरणबारे छानबिन गर्न गृह मन्त्रालयले गठन गरेको समितिका संयोजक तत्कालीन उपसचिव पुष्कर राना र सदस्य शाखा अधिकृत पर्शुराम पोखरेलले दोषीलाई जोगाउने उद्देश्यले भ्रामक प्रतिवेदन तयार गरेको दाबी समेत अख्तियारले गरेको छ।
अख्तियारले घटनामा संलग्न सबै व्यक्तिविरुद्ध कानुनबमोजिम कारबाही र सजायको माग गर्दै विशेष अदालतमा मुद्दा दायर गरेको जनाएको छ।
