काठमाडौं । रवि लामिछानेले भारतीय प्रधानमन्त्री नरेन्द्र मोदीसँग भएको भेटपछि नेपाल–भारत सम्बन्धलाई नयाँ उचाइमा लैजान सकिने बताएका छन्।
भारत भ्रमणका क्रममा बुधबार प्रधानमन्त्री मोदीसँग झण्डै एक घण्टा लामो भेटवार्ता गरेका लामिछानेले सामाजिक सञ्जाल एक्समार्फत भेटलाई फलदायी र भविष्यकेन्द्रित संवादको रूपमा व्याख्या गरेका छन्।
लामिछानेका अनुसार भेटका क्रममा नेपाल र भारतबीच विगतमा देखिएका जटिलता र अप्ठ्याराहरूलाई पार गर्दै विकास, समृद्धि र साझा हितमा आधारित नयाँ कूटनीतिक सम्बन्ध निर्माण गर्ने विषयमा गहन छलफल भएको थियो।
उनले नेपाल–भारत सम्बन्धलाई केवल राजनीतिक र कूटनीतिक दृष्टिकोणबाट मात्र नभई साझा सभ्यता, आर्थिक विकास र प्रविधिमैत्री सहकार्यको आधारमा अगाडि बढाउनुपर्नेमा जोड दिएका छन्।
‘हामीले साझा सभ्यतागत सम्बन्ध, डिजिटल कोरिडोर र सहज कनेक्टिभिटीमा केन्द्रित भएर मात्र प्रगति र आपसी विश्वासमा आधारित साझेदारी निर्माण गर्न सक्छौँ,’ लामिछानेले उल्लेख गरेका छन्।
उनले राष्ट्रिय स्वतन्त्र पार्टी र भारतका जनताको साझा समृद्धिका लागि रहेका सम्भावनालाई व्यवहारमा रूपान्तरण गर्न आफू प्रतिबद्ध रहेको पनि बताएका छन्।
रास्वपाका सभापति लामिछानेको भारत भ्रमणलाई राजनीतिक वृत्तमा चासोका साथ हेरिएको छ। भारतीय जनता पार्टी (भाजपा) को निमन्त्रणामा भारत पुगेका उनले पछिल्ला दिनहरूमा भारतका उच्च राजनीतिक नेतृत्वसँग लगातार भेटवार्ता गरिरहेका छन्।
भारतीय विदेशमन्त्री एस जयशंकर सँगको भेटपछि प्रधानमन्त्री मोदीसँग भएको संवादलाई लामिछानेको भ्रमणको सबैभन्दा महत्वपूर्ण भेटका रूपमा हेरिएको छ।
राजनीतिक विश्लेषकहरूका अनुसार नेपाल–भारत सम्बन्ध, आर्थिक सहकार्य, डिजिटल पूर्वाधार, व्यापार, लगानी तथा सीमापार कनेक्टिभिटीका विषयमा भएको छलफलले आगामी दिनमा दुई देशबीचको सम्बन्धलाई नयाँ ढंगले परिभाषित गर्ने संकेत दिएको छ ।
