विराटनगर । मोरङको कटहरी गाउँपालिका–२ स्थित जीवन विकास सामुदायिक अस्पताल तथा टेक्निकल एजुकेसन फाउन्डेसनले जापानी प्रविधिमा आधारित अत्याधुनिक एमआरआई र सिटी स्क्यान सेवाको औपचारिक शुभारम्भ गरेको छ। अस्पतालले पत्रकार सम्मेलन आयोजना गर्दै नयाँ प्रविधिसहितको स्वास्थ्य सेवा सञ्चालनमा ल्याइएको जानकारी दिएको हो।
अस्पतालले आफ्नो सेवा विस्तार गर्ने क्रममा विश्वसनीय फुजिफिल्म इशेलोन स्मार्ट १.५ टेस्ला एमआरआई सिस्टम तथा १२८ स्लाइस सिटी स्क्यान सेवा औपचारिक रूपमा सञ्चालनमा ल्याएको जनाएको छ। अत्याधुनिक प्रविधिमा आधारित यी उपकरणले बिरामीको रोग पहिचानलाई थप छिटो, सटीक र प्रभावकारी बनाउने अस्पताल प्रशासनको विश्वास छ।
ग्रामीण तथा मध्यम आय भएका नागरिकलाई सहज र गुणस्तरीय स्वास्थ्य सेवा उपलब्ध गराउने उद्देश्यसहित अस्पतालले करिब १० करोड रुपैयाँ लागतमा एमआरआई मेसिन र झन्डै ४ करोड रुपैयाँ लागतमा सिटी स्क्यान मेसिन खरिद गरेको जनाएको छ। अस्पतालका अनुसार यी उपकरण सञ्चालनमा आएपछि पूर्वी नेपालका बिरामीले सामान्य परीक्षणका लागि काठमाडौं वा अन्य ठूला सहर धाउनुपर्ने बाध्यता कम हुने अपेक्षा गरिएको छ।
हाल २०० शैयाको सेवा सञ्चालन गरिरहेको अस्पतालमा दैनिक ६० देखि ७० जना बिरामी उपचारका लागि आउने गरेका छन्। अस्पताल प्रशासनका अनुसार अत्याधुनिक उपकरण अभावका कारण यसअघि धेरै बिरामी अन्यत्र रिफर गर्नुपर्ने अवस्था रहेकाले नयाँ सेवा सञ्चालनसँगै उपचार प्रणाली थप प्रभावकारी बन्ने विश्वास गरिएको छ।
अस्पतालले हाल आकस्मिक तथा ट्रमा सेवा, बहिरङ्ग सेवा (ओपीडी), मेडिसिन, शल्यक्रिया, स्त्री तथा प्रसूति रोग, ग्यास्ट्रो रोग, बालरोग, हाडजोर्नी, दन्त सेवा, आँखा, नाक–कान–घाँटी सेवा, मानसिक स्वास्थ्य, रेडियोलोजी तथा प्याथोलोजी सेवा सञ्चालन गरिरहेको जनाएको छ।
त्यस्तै सघन उपचार सेवा अन्तर्गत नवजात शिशु सघन उपचार कक्ष (एनआईसीयू), बाल सघन उपचार कक्ष (पीआईसीयू), मुटुरोग सघन उपचार कक्ष (सीसीयू) तथा उच्च निगरानी कक्ष (एचडीसीयू) सेवासमेत उपलब्ध रहेको अस्पतालले जानकारी दिएको छ। ग्रामीण क्षेत्रमै विशेषज्ञ सेवा विस्तार गरिएकाले बिरामीलाई सहज भएको अस्पतालको दाबी छ।
पत्रकार सम्मेलनमा अस्पताल प्रशासनले निजी अस्पतालको महँगो उपचार प्रणालीभन्दा फरक ढंगले सेवा प्रवाह गर्ने प्रतिबद्धता व्यक्त गरेको छ। बिरामीलाई आर्थिक भार नपर्ने गरी कोशी अञ्चल अस्पताल तथा सरकारी अस्पतालको तुलनात्मक दरमै सेवा उपलब्ध गराइने अस्पतालले जनाएको छ।
अस्पतालले सरकारले स्वास्थ्य बीमासम्बन्धी नयाँ व्यवस्था लागू गरे त्यसलाई समेत कार्यान्वयन गर्न तयार रहेको उल्लेख गरेको छ। हाल भने नयाँ बीमा नीति पूर्ण रूपमा कार्यान्वयनमा नरहेको अस्पताल प्रशासनको भनाइ छ।
अस्पतालले चाँडै क्याथल्याब सेवा सञ्चालनको तयारीसमेत भइरहेको जानकारी दिएको छ। मुटुरोग सम्बन्धी जटिल परीक्षण र उपचारका लागि आवश्यक क्याथल्याब सेवा सुरु भएपछि प्रदेशकै स्वास्थ्य क्षेत्रमा थप ठूलो उपलब्धि हुने अपेक्षा गरिएको छ।
अस्पतालका अध्यक्ष योगेन्द्र मण्डलका अनुसार अस्पतालले विगत दुई वर्षदेखि ग्रामीण क्षेत्रका नागरिकलाई लक्षित गर्दै सेवा दिँदै आएको छ। नेपाल सरकारको निर्देशनअनुसार अस्पतालले समग्र उपचार सेवामा १० प्रतिशत छुट प्रदान गर्दै आएको उनले बताए।
उनका अनुसार आर्थिक अवस्था कमजोर भएका केही बिरामीलाई अस्पतालले निःशुल्क उपचार मात्र नभई खान–बस्नको समेत व्यवस्था गरेर घर फर्काउने गरेको छ। “हामी अस्पताललाई केवल पैसा कमाउने माध्यमका रूपमा होइन, सामाजिक उत्तरदायित्व बोकेको स्वास्थ्य संस्था भनेर सञ्चालन गरिरहेका छौँ,” उनले भने।
अस्पताल प्रशासनले विशेष गरी मध्यम तथा निम्न आय भएका नागरिकलाई सहज, सुलभ र विश्वसनीय स्वास्थ्य सेवा प्रदान गर्ने लक्ष्यसहित सेवा विस्तार गरिएको जनाएको छ। आधुनिक उपकरण, सहुलियत दर र सामाजिक उत्तरदायित्वसहितको सेवाले ग्रामीण भेगका बिरामीलाई प्रत्यक्ष राहत पुग्ने अपेक्षा गरिएको छ।
