वीरगञ्ज ।दुर्गा प्रसाईं सोमबार राति वीरगञ्ज बाट पक्राउ परेका छन्। जिल्ला प्रहरी कार्यालय पर्साको टोलीले उनलाई वीरगञ्जस्थित दियालो होटलबाट नियन्त्रणमा लिएको हो।
प्रहरीले पक्राउका क्रममा केहीबेर वादविवादसमेत भएको जनाएको छ। प्रारम्भिक समयमा पक्राउको स्पष्ट कारण सार्वजनिक नगरिए पनि अहिले उनी प्रहरी हिरासतमै रहेका छन्।
पर्सा प्रहरीका प्रवक्ता तथा डीएसपी हरि बस्नेतका अनुसार प्रसाईंले दिएका सार्वजनिक अभिव्यक्ति तथा सार्वजनिक शान्तिमा खलल पुगेको विषयमा अनुसन्धान भइरहेको छ। यद्यपि उनीविरुद्ध हालसम्म औपचारिक रूपमा म्याद थप गरिएको छैन।
राष्ट्र, राष्ट्रियता, धर्म, संस्कृति र नागरिक बचाउन महाअभियान नेपालका संयोजकसमेत रहेका प्रसाईं सोमबार सिमरा विमानस्थल हुँदै वीरगञ्ज पुगेका थिए। मंगलबार आयोजना हुने कार्यक्रममा सहभागी हुन उनी त्यहाँ गएको बताइएको छ।
वीरगञ्ज पुगेलगत्तै उनले सञ्चारकर्मीसँग कुराकानी गर्दै वर्तमान सरकार र राष्ट्रिय स्वतन्त्र पार्टीका सांसदहरूमाथि आलोचनात्मक टिप्पणी गरेका थिए।
घटनापछि प्रसाईं पक्राउको विषय राजनीतिक र सामाजिक वृत्तमा चासोको विषय बनेको छ। प्रहरीले अनुसन्धान जारी रहेको जनाएको छ।
