पोखरा– काठमाडौंमा सुकुम्वासी बस्ती हटाउन डोजर अभियान तीव्र बनेसँगै पोखराका सुकुम्वासीहरू त्रसित बनेका छन्।‘डोजर आतंक बन्द गर’ भन्ने नारासहित उनीहरूले सोमबार पोखराका सडकमा प्रदर्शन गर्दै सरकार र स्थानीय तहको कदमप्रति विरोध जनाएका हुन्।
पोखरा महानगरपालिकाले सरकारी तथा सार्वजनिक जग्गा अतिक्रमण गरी निर्माण गरिएका संरचना खाली गर्न ३५ दिनको अल्टिमेटम दिएको छ। वैशाख ३ गतेको कार्यपालिका बैठकको निर्णयअनुसार वैशाख ४ गते सूचना जारी गरिएको हो।
महानगरपालिका–९ बसपार्क क्षेत्रमा करिब ४ सय ७५ घरधुरी सुकुम्वासी बसोबास गर्दै आएका छन्। उनीहरूले वैकल्पिक व्यवस्थाबिना बस्ती खाली नगर्ने अडान लिँदै उचित पुनर्वासपछि मात्रै डोजर चलाउनुपर्ने माग गरेका छन्।
आफ्ना माग सम्बोधनका लागि सुकुम्वासीहरूले जिल्ला प्रशासन कार्यालय मार्फत प्रधानमन्त्रीलाई ज्ञापनपत्र बुझाएका छन्। त्यसअघि पृथ्वीचोकमा र्यालीसहित कोणसभा गरिएको थियो।
काठमाडौंमा सुरु भएको बस्ती हटाउने अभियानले देशका अन्य शहरमा पनि प्रभाव पार्न थालेको देखिएको छ, जसले सुकुम्वासी व्यवस्थापनको विषयलाई थप संवेदनशील बनाएको छ।
