काठमाडौं । रवि लामिछानेले सीमा क्षेत्रमा बढ्दो तस्करी नियन्त्रण गर्न सरकारले कडाइ गरेको बताएका छन्। राष्ट्रिय स्वतन्त्र पार्टी का सभापति समेत रहेका उनले हाल देखिएको असन्तुष्टिलाई तस्करी नियन्त्रणका प्रयाससँग जोडेर हेर्नुपर्ने बताए।
आइतबार निजी क्षेत्रसँगको संवादमा उनले सीमा क्षेत्रमा बसोवास गर्ने नागरिकहरूको जीवनशैली नै सीमापार आवतजावतमा आधारित भए पनि खुला तस्करीलाई राज्यले बेवास्ता गर्न नसक्ने स्पष्ट पारे।
“सीमा क्षेत्रका मानिसहरू वारिपारि गएर सस्तो बजारबाट किनमेल गरेर जीवन चलाउँछन्,” उनले भने, “तर सँगै यहाँका व्यवसायीहरूको संरक्षण पनि आवश्यक छ। उपभोक्ता र व्यवसायी दुवै पक्षलाई ध्यानमा राखेर नीति बनाइनुपर्छ।”
लामिछानेले सीमा क्षेत्र संवेदनशील भएकाले हालको कडाइलाई पुनर्विचार गर्ने तयारी भइरहेको पनि बताए। उनका अनुसार सरकारको लक्ष्य एकातर्फ तस्करी नियन्त्रण गर्नु हो भने अर्कोतर्फ जनजीवन सहज बनाउनु पनि हो।
“हाम्रा उद्यमी–व्यवसायीको उन्नति र उपभोक्ताको सहज जीवनबीच सन्तुलन कायम गर्न केही समय लाग्न सक्छ,” उनले भने, “यसलाई अन्यथा रूपमा नलिन आग्रह गर्छौं।”
