काठमाडौं । गगनकुमार थापाले स्पष्ट बहुमत भए पनि सरकार ‘खतरनाक भ्रम’मा परेको टिप्पणी गरेका छन्। नेपाल ट्रेड युनियन कांग्रेसको राष्ट्रिय परिषद् बैठकलाई सम्बोधन गर्दै उनले लोकतन्त्रमा ‘रुल अफ ल’ र ‘रुल बाइ ल’ बीचको भिन्नता नबुझिँदा समस्या उत्पन्न भएको बताए।“डेमोक्रेसीमा ‘रुल अफ ल’ र ‘रुल बाइ ल’ दुईवटा आधारभूत रूपमा फरक कुरा हुन्,” उनले भने, “कानुनको शासन र कानुनले शासन—सुन्दा एउटै जस्तो लाग्छ, तर यसको अर्थ बिल्कुल फरक छ।”
थापाका अनुसार लोकतन्त्रमा ‘रुल अफ ल’ अर्थात् कानुनको शासन अपेक्षित र वाञ्छनीय हुन्छ, जसले सरकारलाई कानुनको सेवक बनाउँछ। तर ‘रुल बाइ ल’ले कानुनलाई सरकारको ‘डण्डा’ बनाउने खतरा रहन्छ, जहाँ आवश्यकता अनुसार प्रयोग गरिने औजारजस्तो हुन्छ।
उनले राष्ट्रिय स्वतन्त्र पार्टी (रास्वपा) लाई जनताले पाँच वर्षका लागि सरकार सञ्चालन गर्ने म्यान्डेट दिएको उल्लेख गर्दै त्यसअनुसार जिम्मेवारी निर्वाह गर्न आग्रह गरे। साथै, सोही निर्वाचनले नेपाली कांग्रेस लाई प्रतिपक्षको भूमिकामा रहन म्यान्डेट दिएको उनको भनाइ थियो।
“प्रतिपक्षको काम प्रश्न गर्ने, खबरदारी गर्ने, आवश्यक पर्दा प्रतिवाद र प्रतिरोध गर्ने तथा विकल्प प्रस्तुत गर्ने हो,” उनले भने, “प्रतिपक्ष कमजोर भयो भने सरकारलाई जवाफदेही बनाउन सकिँदैन।”
थापाले आगामी पाँच वर्षसम्म कांग्रेसले सभ्य र विनम्र तर दृढ रूपमा प्रतिपक्षको भूमिका निर्वाह गर्ने बताए। उनले सरकारलाई कांग्रेसको विनम्रतालाई कमजोरी नठान्न आग्रह गर्दै भने, “हामी नम्र छौं, तर कमजोर होइनौं। हामी दृढ छौं र आवश्यक पर्दा स्पष्ट रूपमा उभिन्छौं।”
