नेपाली कांग्रेसका पूर्वसभापति शेरबहादुर देउवाको प्यानलमा चुपचाप देखिएका भीष्मराज आङ्देम्बेको राजनीतिक भाग्य भने सभापति गगन थापाले खोलिदिएका छन् । थापाले उनलाई समानुपातिकबाट पाँचथरको प्रतिनिधिसभा सदस्य मात्र बनाएनन्, कांग्रेसको इतिहासमै पहिलोपटक जनजाति समुदायबाट संसदीय दलको नेता बनाउँदै देउवा समूहको छायाँमा हराइरहेका अनुहारलाई शक्तिको केन्द्रमा पुर्याइदिएका छन्। पहिलो संविधानसभा सदस्य निर्वाचनपछि कांग्रेसले पहिलोपल्ट दलको नेता सर्वसम्मत चयन गरेको हो ।
यसले पार्टीभित्र शक्ति सन्तुलनको नयाँ सन्देश दिएको छ। यसअघि मोहन आचार्य र अर्जुननरसिंह केसीको नामसमेत चर्चामा रहे पनि अन्तिममा आङ्देम्बेको नाममा सहमति जुटेको हो । उनलाई पूर्वसभापति देउवा र शेखर कोइराला पक्षको समेत समर्थन रहेको थियो भने सर्वसम्मतिमा दलको नेता चयन गर्न उपसभापति विश्वप्रकाश शर्माले पनि सक्रियता देखाएका थिए। उनले लामो समयदेखि पार्टीभित्रको राजनीतिक सन्तुलन मिलाउन र मझधारको भूमिका निर्वाह गर्दै आएका थिए। तर उनको यात्रा सजिलो थिएन ।
२०२० सालमा पाँचथरको फाल्गुनन्द गाउँपालिका-१ साविक नवमीडाँडामा जन्मेका उनी विभिन्न आन्दोलनमा सक्रिय रहेका छन् । कांग्रेसको १४ औं महाधिवशेनमा नेता आङ्देम्बे निवर्तमान सभापति शेरबहादुर देउवाको प्यानलबाट आदिवासी-जनजाति कलस्टरअन्तर्गत सहमहामन्त्रीमा निर्वाचित भएका थिए । उनी संविधानसभा सदस्य निर्वाचन २०७० मा संविधानसभाका सदस्य थिए । तत्कालीन समयमा उनले संसद्को उद्योग, वाणिज्य, आपूर्ति तथा उपभोक्ता हित समिति सभापतिको जिम्मेवारी सम्हालेका थिए ।
आङदेम्बेले २०७७ सालमा कांग्रेसको केन्द्रीय अनुशासन समितिको संयोजकको जिम्मेवारी सम्हालेका थिए। २०३६ सालमा उनी पाँचथरको फिदिम माध्यामिक विद्यालयमा अध्ययनरत थिए । जनमत संग्रहको समयमा उनले विद्यालयमा प्रार्थनाका लागि सहपाठीहरू पंक्ति –लाइनमा उभिएका बेला टाउकोमा कालो रूमाल बाँधेर विद्रोह गरेका थिए । २०३९ सालको राष्ट्रिय पञ्चायतको चुनावमा आङ्देम्बेले आफ्ना बाजे देउमान आङ्देम्बे ९पूर्वमन्त्री० बाट पैसा लिएर कांग्रेस समर्थित पाँचथरका उम्मेदवार मानबहादुर जबेगूलाई आर्थिक सहयोग गरेका थिए ।
२०४२ सालमा कांग्रेस नेताहरू सत्याग्रह बसे । तत्कालीन समयमा आङ्देम्बेले नौ महिना जेल बस्नुपरेको थियो । त्यसपछि उनी पटक-पटक गरी डेढ वर्ष जेल बसेका थिए । २०४२ सालमा नेपाल विद्यार्थी संघको सदस्यता लिएका उनले पहिलो जनआन्दोलनमा केन्द्रीय सदस्यको रूपमा पूर्वाञ्चलको कमाण्ड समेत सम्हालेका थिए । त्यसबेला उनले संगठन निर्माण, कार्यकर्ता परिचालन र लोकतान्त्रिक मूल्यको विस्तारमा महत्वपूर्ण भूमिका खेले । यही अवधिमा उनले नेतृत्व र क्षमता विकास गर्दै पार्टीमा अलग पहिचान बनाउन सफल भए ।
२०४९ को स्थानीय निकायको निर्वाचनताका आङ्देम्बेको नाम जिल्ला विकास समिति पाँचथरको सभापतिका लागि चर्चामा आयो । तर, उनले अग्रह नेता भूविक्रम नेम्बाङलाई समर्थन गरेर जिल्ला विकास समितिको सदस्यमा बसे । जिल्ला विकास समिति सदस्य आङ्देम्बेका लागि पहिलो जनप्रतिनिधिको रूपमा काम गर्ने अनुभव थियो । त्यसपछि उनी पाँचथर प्रतिनिधिसभा निर्वाचन क्षेत्र नम्बर-२ को कांग्रेस सभापति भए ।२०५१ सालमा उनी कांग्रेसको भ्रातृ संगठन नेपाल तरुण दलको केन्द्रीय उपाध्यक्ष भए । त्यसबेला अध्यक्ष बालकृष्ण खाँण थिए ।
२०५६ सालमा आङ्देम्बेले पाँचथर-२ बाट संसदीय निर्वाचन लडेका थिए । उनी दोस्रो संविधानसभा सदस्य निर्वाचन २०७० मा निर्वाचित भए । उनी पार्टीको ११ औं, १२ औं र १३ औं महाधिवेशनमा केन्द्रीय सदस्य थिए ।
