काठमाडौं । नेपालका प्रधानमन्त्री बालेन्द्र शाह (बालेन) अमेरिकाको प्रतिष्ठित टाइम म्यागेजिनको सन् २०२६ का १०० प्रभावशाली व्यक्तिको सूचीमा परेका छन्।
यस वर्षको सूचीमा अमेरिकाका राष्ट्रपति डोनाल्ड ट्रम्पदेखि चीनका राष्ट्रपति सी चिनफिङ सम्म समावेश छन्। नेताहरूको सूचीमा विश्वभरका २५ जना परेका छन्।
३५ वर्षीय शाह फागुन २१ मा सम्पन्न निर्वाचनमा ऐतिहासिक जित हासिल गर्दै प्रधानमन्त्री बनेका थिए। युवापुस्ताको व्यापक समर्थन र अघिल्लो वर्षको जनआन्दोलनको प्रभावले उनको उदय सम्भव भएको टाइमले विश्लेषण गरेको छ।
टाइमका एडिटर-एट-लार्ज चार्ली क्याम्पबेल ले लेखेको प्रोफाइलमा शाहको उदयलाई युवाहरूको राजनीतिक परिवर्तनको लहरका रूपमा चित्रण गरिएको छ। परम्परागत र वंशवादी राजनीतिप्रति असन्तुष्ट जनताको समर्थनले उनलाई राष्ट्रिय नेतृत्वमा पुर्याएको उल्लेख गरिएको छ।
राजनीतिमा प्रवेश गर्नुअघि हिप–हप कलाकारका रूपमा चिनिएका शाहले काठमाडौँ महानगरपालिका का मेयर हुँदा फोहोर व्यवस्थापन, शिक्षा र स्वास्थ्य क्षेत्रमा सुधार ल्याउन महत्वपूर्ण पहल गरेका थिए। यही कार्यशैलीले उनलाई राष्ट्रिय स्तरमा लोकप्रिय बनाएको उल्लेख छ।
शाह आफ्नो स्पष्ट र कडा अभिव्यक्तिका कारण पनि चर्चित छन्। उनले भ्रष्टाचारविरुद्ध खुलेर आवाज उठाउँदै आएका छन्। संगीत पृष्ठभूमिका कारण उनी युवामाझ विशेष प्रभावशाली मानिन्छन्।
यद्यपि, स्थानीय तहमा हासिल गरेको सफलता राष्ट्रिय स्तरमा दोहोर्याउन सक्ने वा नसक्ने भन्ने प्रश्न अझै कायम छ। आर्थिक असमानता, गरिबी र संस्थागत भ्रष्टाचारजस्ता चुनौतीबीच उनको नेतृत्व कत्तिको प्रभावकारी हुन्छ भन्नेमा सबैको ध्यान केन्द्रित भएको टाइमले उल्लेख गरेको छ।
