काठमाडौं — नेपाल स्टक एक्सचेन्ज (नेप्से)ले अबदेखि शुक्रबार पनि शेयर कारोबार सञ्चालन गर्ने निर्णय गरेको छ। सरकारले पेट्रोलियम पदार्थको खपत घटाउने उद्देश्यले आइतबार सार्वजनिक बिदा दिने निर्णय गरेपछि नेप्सेले आफ्नो कारोबार तालिका परिवर्तन गरेको हो।
हिजो बसेको नेप्से सञ्चालक समितिको बैठकले सातामा पाँच दिन कारोबार सुनिश्चित गर्न शुक्रबार बजार खुला गर्ने निर्णय गरेको हो। अब नयाँ व्यवस्थाअनुसार आइतबार शेयर कारोबार बन्द रहनेछ भने शुक्रबार नियमित रूपमा बजार सञ्चालन हुनेछ।
यो व्यवस्था नेप्सेका लागि नयाँ भने होइन। यसअघि २०७९ साल जेठ १ गतेदेखि सरकारले शनिबार र आइतबार दुई दिन सार्वजनिक बिदा लागू गर्दा पनि नेप्सेले शुक्रबार बजार सञ्चालन गरेको थियो। पछि आइतबारको बिदा खारेज भएपछि नेप्से पुरानै तालिकामा फर्किएको थियो।
हालै मन्त्रिपरिषद्को निर्णयअनुसार बढ्दो इन्धन खपत र वैदेशिक मुद्रा सञ्चितिमा परेको दबाबलाई ध्यानमा राख्दै आइतबार सबै सरकारी कार्यालयमा बिदा दिने निर्णय गरिएको थियो। सोही निर्णयलाई कार्यान्वयन गर्दै नेप्सेले लगानीकर्ताको हित र बजारको सक्रियता कायम राख्न शुक्रबार कारोबार सञ्चालन गर्ने निर्णय गरेको जनाएको छ।
नयाँ व्यवस्थाअनुसार अब शनिबार र आइतबार शेयर बजार बन्द रहनेछ भने सोमबारदेखि शुक्रबारसम्म कारोबार हुनेछ।
