काठमाडौं – नयाँ सरकार गठन भएयता नेपाल स्टक एक्सचेन्ज (नेप्से) परिसूचक तीव्र रूपमा घट्दै ९.५९ प्रतिशत अर्थात् २८४ अंकले झरेर २६७६ बिन्दुमा पुगेको छ।
यस अवधिमा लगानीकर्ताको कुल सम्पत्ति मूल्य करिब ४ खर्ब ५० अर्ब रुपैयाँले घटेको छ। सरकार गठनअघि २९६० अंकमा रहेको बजार अहिले लगातार ओरालो लाग्दै आएको छ भने बजार पूँजीकरण ५० खर्बबाट घटेर ४५ खर्ब ५० अर्बमा झरेको छ।
आइतबार मात्रै नेप्से ३.७९ प्रतिशत (१०५ अंक) ले घट्दा बजारमा थप त्रास देखिएको छ। ठूलो गिरावटका कारण धेरै लगानीकर्ता नोक्सानीमै सेयर बेच्न बाध्य भएका छन्।
विशेषगरी सम्पत्ति शुद्धीकरण अनुसन्धानका क्रममा ठूला व्यवसायीमाथि भइरहेको धरपकडले बजारमा मनोवैज्ञानिक असर परेको विश्लेषण गरिएको छ। स्टक ब्रोकर एसोसिएसन अफ नेपालका पूर्वअध्यक्ष नरेन्द्र सिजापति का अनुसार ठूला लगानीकर्ताले सेयर बिक्री बढाउँदा बजार थप दबाबमा परेको हो।
त्यस्तै, सागर ढकाल ले बजारमा डर र अफवाह फैलिँदा अस्वाभाविक गिरावट आएको बताएका छन्। “मनोविज्ञानकै आधारमा बजार चलेकोले अहिलेको गिरावट अस्वाभाविक देखिन्छ,” उनले भने।
यद्यपि, अर्थमन्त्री स्वर्णिम वाग्लेले सरकार पूँजीबजारप्रति नकारात्मक नभएको र पारदर्शिता तथा सुशासनमा जोड दिँदै सुधारका काम अघि बढाइने बताएका छन्।
बजारका जानकारहरूका अनुसार हालको गिरावट छोटो अवधिको मनोवैज्ञानिक प्रभाव हुनसक्ने र सुधारका कदमसँगै बजारले पुनः सकारात्मक लय समात्ने सम्भावना रहेको छ।
