काठमाडौं – पूर्णबहादुर खड्काले नेपाली कांग्रेसको १४ औँ महाधिवेशनबाट निर्वाचित केन्द्रीय कार्यसमिति बैठक बोलाएका छन्।
पूर्वगृहमन्त्री रमेश लेखक पक्राउ परेपछि कार्यवाहक सभापतिको हैसियतमा वक्तव्य जारी गरेका खड्काले मंगलबार बैठक बोलाएका हुन्।
शेरबहादुर देउवा निकट एक नेताका अनुसार १४ औँ महाधिवेशनबाट निर्वाचित केन्द्रीय कार्यसमितिको बैठक बस्नेछ। स्रोतका अनुसार बैठक धुम्बाराहीस्थित एक होटलमा मंगलबार र बुधबार दुई दिनसम्म चल्नेछ।
बैठक लगत्तै प्रदेश सभापति र जिल्ला सभापतिहरूको भेला बोलाउने तयारीसमेत गरिएको खड्कानिकट स्रोतले जनाएको छ।
यसअघि खड्काले ठमेलमा शीर्ष नेताहरूसँग छलफल गरी पहिलोपटक कार्यवाहक सभापतिको हैसियतमा वक्तव्य जारी गरेका थिए। उक्त वक्तव्यमा उनले पूर्वप्रधानमन्त्री केपी शर्मा ओली र रमेश लेखक पक्राउ प्रकरणको संवैधानिक, कानुनी र राजनीतिक रूपमा प्रतिवाद गर्ने बताएका थिए।
