धनगढी – देशमा नयाँ सरकार गठन र पछिल्लो सुरक्षा अवस्थालाई मध्यनजर गर्दै सुदूरपश्चिम प्रदेशमा सुरक्षा निकायलाई हाई अलर्टमा बस्न निर्देशन दिइएको छ।
प्रदेश प्रहरी कार्यालयका अनुसार गृह मन्त्रालय र प्रहरी प्रधान कार्यालयमार्फत उच्च सतर्कता अपनाउन सर्कुलर जारी गरिएको हो। प्रहरी उपरीक्षक सागर बोहरा का अनुसार देशमा विकसित पछिल्लो अवस्था र सम्भावित सुरक्षा चुनौतीलाई ध्यानमा राख्दै यस्तो निर्देशन आएको हो।
उनले भने, “आजदेखि लागू हुने गरी जिल्ला प्रहरी प्रमुखसहित सम्पूर्ण प्रहरी कर्मचारीको बिदा स्थगित गरिएको छ। सबैलाई स्ट्यान्डबाई बस्न निर्देशन दिइएको छ।”
राजधानीमा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउ परेपछि सम्भावित सुरक्षा चुनौती बढ्ने आँकलन गरिएको छ। पक्राउको विरोधमा प्रदर्शन तथा आन्दोलन हुन सक्ने भएकाले प्रदेशभर सतर्कता बढाइएको प्रहरीले जनाएको छ।
प्रदेश प्रहरी कार्यालयले हुल तथा दंगा व्यवस्थापनसम्बन्धी अभ्यास सञ्चालन गर्नसमेत निर्देशन दिएको छ। साथै, सशस्त्र प्रहरी बलबाट पनि उच्च सतर्कतामा रहन निर्देशन आएको बताइएको छ।
यसैबीच, प्रधानमन्त्री बालेन्द्र शाह नेतृत्वको मन्त्रिपरिषद् बैठकले जेन–जी आन्दोलनको छानबिनका लागि गौरीबहादुर कार्की अध्यक्षतामा गठित आयोगको प्रतिवेदन तत्काल कार्यान्वयन गर्ने निर्णय गरेको थियो, जसपछिको विकसित अवस्थालाई ध्यानमा राख्दै सुरक्षा सतर्कता बढाइएको हो।
