काठमाडौं – नेकपा (एमाले) का अध्यक्ष केपी शर्मा ओलीले पछिल्लो राजनीतिक अवस्थाबारे प्रतिक्रिया दिँदै सांसदहरूलाई नआत्तिन आग्रह गरेका छन्। बिहीबार सांसदहरूलाई निर्देशन दिने क्रममा उनले एमाले चरम घट्दा पनि मुलुकको तेस्रो शक्तिका रूपमा रहेको बताएका हुन्।
ओलीले विगतको उदाहरण दिँदै भने, “रास्वपा यसअघि २१ सिटमा थियो, हामी अहिले पनि त्यतिबेलाको रास्वपाभन्दा बढी संख्यामा छौँ। हामी कुनै गल्तीका कारण सरकारबाट हटेका होइनौँ, बरु घृणा र चौतर्फी हमलाका कारण बाहिरिनुपरेको हो।”
उनले वर्तमान परिस्थितिमा निराश हुनुपर्ने अवस्था नरहेको उल्लेख गर्दै यसलाई आत्मसमीक्षाको अवसरका रूपमा लिनुपर्ने बताए। “चरम घट्दा पनि एमाले तेस्रो शक्तिका रूपमा कायम छ। यो सन्तोष गर्ने कुरा होइन, तर यथार्थ विश्लेषण हो। अब गम्भीर शिक्षा लिएर आफूलाई चुस्त–दुरुस्त बनाउँदै अघि बढ्नुपर्छ,” उनले भने।
ओलीले रास्वपाको दुईतिहाइ नजिकको सफलता अस्वाभाविक रहेको टिप्पणी गर्दै त्यसलाई ‘जादुमयी परिणाम’ को संज्ञा दिए। “जादुगरले परेवा निकालेजस्तो नतिजा आएको हो। यस्तो अवस्थाबाट आत्तिनु पर्दैन। कुनै पनि कुरा चरम बिन्दुमा पुगेपछि त्यसको गिरावट सुरु हुन्छ,” उनले भने।
