काठमाडौं– नेपाली कांग्रेसले नवनिर्वाचित सांसदहरूका लागि विशेष अभिमुखीकरण कार्यक्रम सञ्चालन गर्ने निर्णय गरेको छ। ललितपुरको कोपुण्डोलस्थित पार्टी केन्द्रीय कार्यालय बी.पी. स्मृति भवनमा बुधबार बसेको केन्द्रीय कार्यसमिति बैठकले यस्तो निर्णय गरेको हो।
पार्टी सभापति गगनकुमार थापाको सभापतित्वमा मंगलबारदेखि बुधबारसम्म चलेको बैठकले प्रतिनिधिसभा निर्वाचन (फागुन २१)बाट प्रत्यक्ष तथा समानुपातिक प्रणालीमार्फत निर्वाचित सांसदहरूलाई प्रशिक्षण दिने निर्णय गरेको हो।
यसैगरी, राष्ट्रियसभामा निर्वाचित नयाँ सदस्यहरूलाई पनि आगामी चैत १४ गते अभिमुखीकरण कार्यक्रममार्फत प्रशिक्षण प्रदान गरिने कांग्रेसले जनाएको छ।
पार्टीका अनुसार, अभिमुखीकरण कार्यक्रममा संसदीय अभ्यास, विधायन प्रक्रिया, सांसदको भूमिका तथा प्राथमिकता, साथै पार्टीको घोषणापत्र र प्रतिबद्धताबारे विस्तृत जानकारी दिइनेछ।
यस कार्यक्रममार्फत नवनिर्वाचित जनप्रतिनिधिहरूलाई प्रभावकारी रूपमा संसदीय जिम्मेवारी निर्वाह गर्न सक्षम बनाउने लक्ष्य लिइएको कांग्रेसले जनाएको छ।
