काठमाडौं । नेपाली कांग्रेस केन्द्रीय कार्यसमितिको बैठक आज पनि बस्ने भएको छ। बैठक बिहान ११ बजे बिपी स्मृति भवन स्थित पार्टी केन्द्रीय कार्यालयमा बस्ने कार्यवाहक मुख्यसचिव दुलाल ले जानकारी दिए।
मंगलबारदेखि सुरु भएको बैठकमा विभिन्न ११ प्रस्तावमाथि छलफल भइरहेको छ। बैठक गगनकुमार थापा को सभापतित्वमा सुरु भएको हो भने महामन्त्री प्रदीप पौडेल ले प्रस्तावहरू प्रस्तुत गरेका थिए।
बैठकमा समसामयिक राजनीतिक अवस्था, सुशासन स्थापना, संविधान संशोधनका लागि अध्ययन समिति गठन, पार्टीको १५औँ महाधिवेशनको कार्यतालिका तथा केन्द्रीय निर्वाचन समिति गठनलगायत विषयमा छलफल भइरहेको छ।
यसैगरी, प्रतिनिधिसभा सदस्यहरूको अभिमुखीकरण, क्रियाशील सदस्यता वितरण, प्रदेश तथा स्थानीय सरकारको समीक्षा, भ्रातृ संस्था व्यवस्थापन र केन्द्रीय लेखा समिति गठनजस्ता विषयमा पनि छलफल भएको जनाइएको छ।
मंगलबारको बैठकमा केन्द्रीय सदस्यहरूले आ–आफ्ना धारणा राखेका थिए भने आजको बैठकमा बाँकी सदस्यहरूले आफ्नो विचार प्रस्तुत गर्नेछन्।
