विराटनगर । नेपाल जेनजी फ्रन्टले माइतीघर मण्डलामा जेन-जी अभियन्ता रक्षा बममाथि भएको दुर्व्यवहारको कडा निन्दा गरेको छ।
भदौ २३ र २४ गतेका घटनाको छानबिन प्रतिवेदन सार्वजनिक गर्न माग गर्दै माइतीघर मण्डलामा भइरहेको शान्तिपूर्ण प्रदर्शनका क्रममा बममाथि बिहीबार दुर्व्यवहार भएको थियो । फ्रन्टले शान्तिपूर्वक आन्दोलन गर्ने अधिकारमाथि आक्रमण सह्य नहुने स्पष्ट पारेको छ ।
आज एक विज्ञप्ति जारी गर्दै फ्रन्टले चैत ५ गते संयोजक बममाथि भएको घटनाको घोर भर्त्सना गरेको हो । शान्तिपूर्वक भेला हुने र विचार राख्ने संवैधानिक अधिकारको प्रयोग गरिरहेकी आन्दोलनकारीमाथिको आक्रमण सभ्य लोकतान्त्रिक समाजमा सह्य नहुने फ्रन्टले स्पष्ट पारेको विज्ञप्तिमा उल्लेख छ ।
विज्ञप्तिमा सहिद परिवार र घाइतेका आफन्तको पीडा, आक्रोश र प्रश्नलाई आफूहरूले सधैँ सम्मान गर्ने उल्लेख गरिएको छ। तर, आन्दोलनकारीबीच आपसमा हुने यस्ता आक्रमणले आन्दोलनलाई कमजोर बनाउने भन्दै फ्रन्टले सचेत गराएको छ।
विज्ञप्तिमा भनिएको छ,‘यी प्रश्नको उत्तर एकअर्कामाथि नभई राज्यसँग खोजिनुपर्छ । राज्यले अझैसम्म सत्य लुकाएर बसेको छ। यस्तो अवस्थामा एक आन्दोलनकारीमाथि भएको दुर्व्यवहार र आक्रमणले आन्दोलनलाई थप कमजोर बनाउनेछ।’
विज्ञप्तिमा संयोजक बमको राजनीतिक अडान र इमानदारीको बचाउ गरिएको छ। बमले भदौ २३ गते बिहान माइतीघरमा आन्दोलनको अनुशासनबारे बोलेको, जङ्गी अड्डामा अनधिकृत प्रवेशको विरोध गरेको र निर्वाचित राष्ट्रपतिसँग मात्र छलफल गर्ने अडान राखेको स्मरण गराइएको छ।
फ्रन्टले भनेको छ,’सिंगो देश परिवर्तनको पक्षमा उभिरहेको र आन्दोलनको बलमा संसदमा पुग्न अत्यन्तै सहज रहेको अवस्थामा बमले सडक रोजेकी हुन् ।’
छानबिन प्रतिवेदन सार्वजनिक नहुने सम्भावना बढ्दै गएको प्रति चिन्ता व्यक्त गर्दै फ्रन्टले सम्पूर्ण आन्दोलनकारी, घाइते र सहिद परिवार एउटै यात्राका साझेदार भएको बताएको छ।
