काठमाडौं — नेपाल कम्युनिस्ट पार्टी (एमाले) का नेता सुरेन्द्र पाण्डेले जनताले मतपत्रमार्फत ‘अस्वीकार’ को कठोर फैसला सुनाइसकेपछि आफ्नै कार्यकर्तालाई सत्य बोलेको आधारमा कारबाहीको धम्की दिनु कति बुद्धिमानी हुने भन्ने प्रश्न उठाएका छन्।
सामाजिक सञ्जालमार्फत उनले यति ठूलो नैतिक पराजयपछि पनि अरूलाई कारबाही गर्ने ‘नैतिक आधार’ नेतृत्वसँग कति बाँकी छ भन्ने प्रश्न गरेका हुन्।
पाण्डेले पार्टीको वर्तमान संरचना र कार्यशैली नै ‘रिसेट’ गर्नुपर्ने बेला आइसकेको बताएका छन्। उनका अनुसार यस्तो गम्भीर मोडमा पनि ‘सबै ठीक थियो, हामीलाई त फसाइयो’ भन्ने निष्कर्ष निकाल्नु आफैँलाई धोका दिनु हो।
उनले अन्तर्घात वा षड्यन्त्रले बढीमा ५–१० हजार मत मात्र तलमाथि हुन सक्ने उल्लेख गर्दै देखिएको ४०–५० हजारको मतान्तरलाई ‘फसाइएको’ भनेर व्याख्या गर्नु जनताको विवेकको अपमान हुने बताएका छन्।
पाण्डेका अनुसार अब पनि पार्टीले आफ्नो तरिका बदल्ने आँट नगरी ‘अरू असफल होलान् र फेरि हाम्रो पालो आउला’ भन्ने सोचमै अल्झिरहने हो भने त्यो पार्टी र देश दुवैका लागि घातक हुन सक्छ।
