काठमाडौं । फागुन २१ गते सम्पन्न प्रतिनिधिसभा सदस्य निर्वाचनको समग्र समीक्षाका लागि सात दिनभित्र प्रतिवेदन बुझाउन मातहतका समितिलाई नेपाली कम्युनिष्ट पार्टी (नेकपा) ले निर्देशन दिएको छ। पार्टी केन्द्रीय कार्यालय पेरिसडाँडाले ‘निर्वाचन विशेष निर्देशन–३’ पठाउँदै प्रत्येक निर्वाचन क्षेत्र अन्तर्गत गठित निर्वाचन परिचालन समितिलाई निर्देशन दिइएको हो।
पार्टीका संयोजक पुष्पकमल दाहाल र सहसंयोजक माधवकुमार नेपालद्वारा हस्ताक्षरित उक्त निर्देशनमा निर्वाचन परिचालनका क्रममा भएका समग्र गतिविधिको तथ्ययुक्त अध्ययन गरी एक हप्ताभित्र केन्द्रीय कार्यालयमा प्रतिवेदन पठाउन भनिएको छ।
असामान्य परिस्थितिका बीच पार्टीले गरेको काम र प्रतिस्पर्धी दलको गतिविधिको सूक्ष्म अध्ययन गर्न भन्दै नेतृत्वले समीक्षा प्रतिवेदन माग गरेको हो। एक हप्ताभित्र पठाउनुपर्ने सो प्रतिवेदनमा निर्वाचन परिचालन समितिको गठन, नेता कार्यकर्ताको जिम्मेवारी निर्धारण, प्रचार अभियानको योजना, आर्थिक परिचालन, प्रचार सामग्रीको वितरण र डिजिटल मिडिया तथा सामाजिक सञ्जालको प्रयोगबारे तथ्ययुक्त विश्लेषण गर्न निर्देशन दिइएको छ।
बुथ समिति निर्माण, स्वयंसेवक परिचालन, आफ्ना उम्मेदवारको प्रभावकारिता, विपक्षी दलका गतिविधि, प्रमुख दलले प्राप्त गरेको मतको अवस्था, निर्वाचनमा आइपरेका चुनौती र समग्र सबल तथा कमजोर पक्षलाई समेटेर सुझावसहितको यथार्थ प्रतिवेदन यथाशीघ्र पठाउन नेतृत्वले निर्देशन दिएको छ।
नेकपाले निर्वाचनमा अपेक्षा गरे अनुसारको परिणाम नआउनुमा विभिन्न कारण रहेको जनाएको छ।
