विराटनगर । सर्वोच्च अदालतले नेकपा माओवादी (विप्लव)का नेता कुमार पौडेलको हत्यामाथि अनुुसन्धान गर्न आदेश दिएको छ। सर्वोच्चको आदेशसँगै प्रहरीले तत्कालीन गृहमन्त्री रामबहादुर थापा (बादल), प्रहरी महानिरिक्षक सवेन्द्र खनाल, तत्कालीन प्रमुख जिल्ला अधिकारी कृष्णबहादुर राउत लगायत विरुद्ध परेको किटानी जाहेरीमाथि अनुसन्धान हुनेछ । बिहीबार न्यायाधीशहरू डा.मनोजकुमार शर्मा र श्रीकान्त पौडेलको इजलासले जाहेरीमाथि अनुसन्धान अघि बढाउन परमादेश जारी गरेको हो।
सर्लाहीको लालबन्दी नजिक लखन्देही जंगलमा २०७६ असार ५ गते प्रहरीको गोली लागी पौडेलको मृत्यु भएको थियो । प्रहरीले दोहोरो मुठभेड भने पनि पीडित परिवारले नियन्त्रणमा लिएर हत्या गरेको आरोप लगाएका छन् ।
कुमारकी आमा दुर्गादेवी पौडेलले तत्कालीन गृहमन्त्री रामबहादुर थापा ‘बादल’ प्रहरी महानिरीक्षक सर्वेन्द्र खनाल, प्रमुख जिल्ला अधिकारी कृष्णबहादुर राउत लगायत विरुद्ध किटानी जाहेरी दिएकी थिइन् । प्रहरीले जाहेरी नलिएपछि सर्वोच्चमा रिट दायर गरिएको थियो ।
यसअघि २०७८ सालमा अदालतले अनुसन्धान आदेश दिएको थियो । तर कार्यान्वयन भएन ।
यसले तत्कालीन प्रमुख जिल्ला अधिकारी राउत (हाल निर्वाचन आयोग सचिव), पूर्वआईजीपी खनाल, प्रहरी अधिकृत कृष्णदेव साह, विनोद शाह, सत्यनारायण मिश्र, एसपी गोपाल भट्टराई, डीआईजी हरिबहादुर पाल, इन्सपेक्टर किरण न्यौपाने, असई सूर्यकुमार कार्की, डा. वीरेन्द्र मण्डल र बागमती नगरपालिका मेयर भरतकुमार थापासहित १० जनाविरुद्ध कर्तव्य ज्यान मुद्दामा अनुसन्धान गर्न बाटो खोलिदिएको छ ।
पीडित परिवारका अनुसार घटना राजनीतिक प्रतिशोध र स्थानीय नेताहरूको योजनाबाट भएको हो, जसमा बादलको निर्देशन र खनालको संलग्नता रहेको दाबी छ ।
