काठमाडौं। फागुन २१ गते सम्पन्न प्रतिनिधिसभा सदस्य निर्वाचनमा सुदूरपश्चिम प्रदेशमा ४१ हजार ६२४ मत बदर भएको छ । प्रदेश निर्वाचन कार्यालय धनगढीले १६ वटै निर्वाचन क्षेत्रमा गरी कुल खसेको मतको ४.७१ प्रतिशत मत बदर भएको जनाएको छ । १७ लाख २९ हजार ४५० मतदाता रहेको सुदूरपश्चिम प्रदेशमा आठ लाख ८४ हजार १ सय ७७ मत खसेको थियो । जसमध्ये ४१ हजार ६२४ मत बदर भएको छ ।
पाँच वटा निर्वाचन क्षेत्र रहेको कैलाली क्षेत्र नं १ मा ५९ हजार ३११ मत खसेकामा तीन हजार २५८ मत बदर भएको आयोगले जनाएको छ ।
त्यस्तै, कैलाली निर्वाचन क्षेत्र–२ मा ५६ हजार ९६७ मत खसेकामा २ हजार ६४६ मत बदर भएको छ । त्यसैगरी, ६० हजार ३३२ मत खसेको कैलाली क्षेत्र–३ मा दुई हजार ९१३ मत बदर भएको छ । कैलाली क्षेत्र–४ मा दुई हजार ९०७ मत बदर भएको छ । यस क्षेत्रमा कुल ६३ हजार ११७ मत खसेको थियो । कैलाली–५ मा ६६ हजार २९५ मत खसेकामा दुई हजार ८०७ मत बदर भएको छ ।
तीन वटा निर्वाचन क्षेत्र रहेको कञ्चनपुर निर्वाचन क्षेत्र नं १ मा ६१ हजार ३६७ मत खसेकामा ३ हजार २३४ बदर भएको छ । त्यसैगरी, निर्वाचन क्षेत्र नं २ मा ३ हजार ४३० मत बदर भएको छ भने यहाँ कुल ६६ हजार ५४ मत खसेको थियो । त्यसैगरी, कञ्चनपुर क्षेत्र ३ मा ५८ हजार ५४३ मत खसेकामा ३ हजार ३९९ मत बदर भएको छ ।
त्यसैगरी, दुई वटा निर्वाचन क्षेत्र रहेको अछाममा निर्वाचन क्षेत्र नं १ मा १ हजार ११९ मत बदर भएको छ । यस क्षेत्र कुल ३२ हजार २४३ मत खसेको थियो । अछाम–२ मा ३२ हजार ६५० मत खसेकामा एक हजार ५३१ मत बदर भएको छ । एउटा मात्र निर्वाचन क्षेत्र रहेको बाजुरामा कुल ४५ हजार ६६९ मत खसेकामा १ हजार २ सय मत बदर भएको छ । प्रदेश निर्वाचन कार्यालय धनगढीका अनुसार डोटीमा ५२ हजार ९०६ मत खसेकोमा दुई हजार ४६९ मत बदर भएको छ । त्यसैगरी, दार्चुलामा १ हजार ६०८ मत बदर भएको छ । कुल ५० हजार ९३० मत खसेको थियो । बैतडीमा ७२ हजार ३०८ मत खसेको थियो । यस क्षेत्रमा ४ हजार १२६ मत बदर भएको छ । यसैगरी, डडेलधुरामा २६ हजार २११ मत खसेकामा २ हजार २५ मत बदर भएको छ ।
प्रदेश निर्वाचन कार्यालयका अनुुसार ५१.१२ प्रतिशत मतदान भएकामा ९५.२९ प्रतिशत सदर र ४.७१ प्रतिशत मत बदर भएको जनाएको छ ।
यहाँ १६ सिटमध्ये कैलालीका ५, कञ्चनपुरका ३, बैतडी र डडेलधुरामा राष्ट्रिय स्वतन्त्र पार्टी(रास्वपा) का उम्मेदवार विजयी भएका थिए । डोटी, अछाम–१ र बाजुरामा नेपाली कांग्रेसका उम्मेदवार विजयी भए भने बझाङ, दार्चुला र अछाम–२ मा नेकपा (एमाले) का उम्मेदवार विजयी भएका थिए ।
