काठमाडौं । नेपालका पूर्वप्रधानमन्त्री डा. बाबुराम भट्टराई भोलि (बुधबार) भारत जान लागेका छन्।
नयाँदिल्लीमा आयोजना हुने ‘एनएक्सटी २०२६’ ग्लोबल समिटमा सहभागी हुन उनी भारत जान लागेको उनको सचिवालयले जनाएको छ।
नयाँदिल्लीस्थित भारत मण्डपममा यही मार्च १२, १३ र १४ मा उक्त समिट आयोजना हुँदैछ। समिटमा भट्टराई ‘विशेष अतिथि’का रूपमा सहभागी हुनेछन्।
आयोजकका अनुसार समिटमा विश्वभरका नीति–निर्माता, सांसद, प्रविधि विज्ञ, व्यवसायी तथा प्रतिष्ठित शैक्षिक क्षेत्रका प्रतिनिधिहरू सहभागी हुनेछन्।
सम्मेलनमा विश्व शासन, प्रविधि, अर्थतन्त्र, शिक्षा, सुरक्षा, स्वास्थ्य, वातावरण तथा अन्तर्राष्ट्रिय सम्बन्धलगायत समसामयिक विषयमा छलफल हुने कार्यक्रम रहेको आयोजकले जनाएको छ।
समिटमा भारतीय प्रधानमन्त्री नरेन्द्र मोदी पनि सहभागी हुने बताइएको छ।
विभिन्न देशका सांसद, नीति–निर्माता, विज्ञ तथा युवा प्रतिनिधिहरूको उल्लेख्य सहभागिता रहने यस सम्मेलनलाई समसामयिक वैश्विक बहस र सहकार्यको महत्वपूर्ण मञ्चका रूपमा लिइएको छ।
समिटका क्रममा मार्च १४ मा भट्टराईले ‘कृत्रिम बुद्धिमत्ताको युगमा लोकतन्त्र : डिजिटल सुशासन र युवा’ शीर्षकको सत्रमा सम्बोधन गर्ने कार्यक्रम रहेको उनको सचिवालयले जनाएको छ।
उनी सोही दिन अर्थात् मार्च १४ मा स्वदेश फर्कने कार्यक्रम रहेको छ।
