काठमाडौं — चन्द्र भण्डारी ले गगन थापा लाई राजीनामा दिनुभन्दा छिटो अधिवेशनमा जानु उपयुक्त हुने बताएका छन्।
मंगलबार सामाजिक सञ्जालमार्फत प्रतिक्रिया दिँदै नेपाली कांग्रेस का नेता भण्डारीले अहिले राजीनामा दिने भन्दा पनि जिम्मेवारी पूरा गर्ने समय आएको बताएका हुन्।
उनले लेखेका छन्, “राजीनामा दिने होइन, जिम्मेवारी पूरा गर्ने समय हो। त्यसैले गगनकुमार थापाले नैतिकताको नाममा राजीनामा दिनुभन्दा छिटो अधिवेशनमा जानु नै उपयुक्त, जिम्मेवार र समयसापेक्ष बाटो हो।”
भण्डारीले समस्या देखेर भाग्नु भन्दा पनि समाधान खोजेर संगठन जोगाउनु नै साँचो नेतृत्वको कर्तव्य भएको बताएका छन्। “समस्या देखेर भाग्नु होइन, उपचार गरेर संगठन जोगाउनु नै साँचो नेतृत्वको कर्तव्य हो,” उनले उल्लेख गरेका छन्।
उनका अनुसार अहिलेको अवस्थामा कांग्रेस बचाउनु आफैंमा नैतिक दायित्व भएको भन्दै युवाहरू कांग्रेसबाट टाढिँदै गएको बेला पार्टीलाई नयाँ सोच र नेतृत्वको आवश्यकता रहेको बताएका छन्।
“नैतिकता त नेपाली राजनीतिमा प्रायः मरीसकेको अवस्था छ, त्यसैले अब नयाँ सोच, नयाँ नेतृत्व र नयाँ विरुवा रोप्नैपर्छ,” भण्डारीले लेखेका छन्।
