काठमाडौं — सुनिल शर्माले बजारमा आफ्नो नाम जोडेर विभिन्न हल्ला तथा भ्रम फैलाइएको भन्दै त्यसप्रति गम्भीर ध्यानाकर्षण भएको बताएका छन्।
उनले आफूले सञ्चालन गर्दै आएका नोबेल मेडिकल कलेज र काठमाडौं मेडिकल कलेज मार्फत विगतदेखि नै नागरिकहरूको सेवा तथा सहयोगका विभिन्न कार्यहरू निरन्तर रूपमा हुँदै आएको बताएका छन्। विशेष गरी आर्थिक अवस्था कमजोर भएका नागरिकहरूलाई प्राथमिकतामा राख्दै छुटदेखि निःशुल्क उपचार तथा स्वास्थ्य सेवा प्रदान गरिँदै आएको उनको भनाइ छ।
उनका अनुसार यस्ता सेवा तथा सुविधाहरू देशका विभिन्न स्थानमा सम्बन्धित वडाहरू र जिल्लाहरूमा उचित प्रक्रिया तथा आधिकारिक माध्यममार्फत उपलब्ध गराइँदै आएको छ। नागरिकको आवश्यकता र आर्थिक अवस्थालाई ध्यानमा राखी सेवा प्रदान गर्ने प्रयास निरन्तर जारी रहेको उनले उल्लेख गरेका छन्।
शर्माले चुनावमा हार–जित हुनु र सामाजिक सेवा तथा सत्कर्मबीच कुनै सम्बन्ध नरहेको पनि स्पष्ट पारेका छन्। समाज र राष्ट्रप्रतिको दायित्वलाई आत्मसात गर्दै यस्ता सेवा तथा सहयोगका कार्यहरू आगामी दिनहरूमा पनि देशभर निरन्तर रूपमा जारी रहने उनले बताए।
साथै, बजारमा फैलाइएका हल्ला वा भ्रममा नपर्न र आवश्यक जानकारीका लागि सम्बन्धित वडामा रहेका संस्थासँग आबद्ध प्रतिनिधिहरूसँग सम्पर्क गर्न उनले सबैमा अनुरोध गरेका छन्।
