काठमाडौँ— बिहीबार हुने प्रतिनिधिसभा सदस्य निर्वाचनअन्तर्गत मौन अवधि सुरु भएको छ। राजनीतिक दल र उम्मेदवारको प्रचार–प्रसार अवधि सोमबार मध्यरात १२ बजेबाट सकिएको हो।
निर्वाचन आयोगले फागुन ४ गतेदेखि सोमबार मध्यरातसम्म प्रचारको समय दिएको थियो। मतदान हुनु ४८ घण्टाअघिदेखि मतदान सम्पन्न नभएसम्म कायम रहने मौन अवधिमा निर्वाचनलाई प्रभाव पार्ने कुनै पनि गतिविधि गर्न नपाइने व्यवस्था छ।
मौन अवधिमा के–के गर्न पाइँदैन ?
मत माग्न, प्रचार गर्न वा भेला–सभा आयोजना गर्न
भाषण, छलफल, समीक्षा वा जुलुस गर्न
सामाजिक सञ्जाल (एसएमएस, फेसबुक, भाइबर आदि) मार्फत मत माग्न
निर्वाचनलाई प्रभाव पार्ने आर्थिक कारोबार गर्न
उम्मेदवार वा दलको पक्षमा समाचार, सूचना वा प्रचार सामग्री प्रकाशन/प्रसारण गर्न
मतदान केन्द्रको ३०० मिटर वरिपरि प्रचार सामग्री राख्न
कार्यवाहक प्रमुख निर्वाचन आयुक्त रामप्रसाद भण्डारीका अनुसार मौन अवधिमा निर्वाचनलाई प्रभाव पार्ने गतिविधि गरेको पाइए उम्मेदवारी खारेजी मात्र होइन, छ वर्षसम्म निर्वाचन प्रक्रियामा भाग लिन नपाउने कारबाही हुन सक्छ।
आयोगले निर्वाचनलाई प्रभाव पार्ने गतिविधिप्रति ‘शून्य सहनशीलता’ अपनाइने स्पष्ट पारेको छ। मौन अवधिले मतदातालाई स्वतन्त्र र निष्पक्ष वातावरणमा सोच–विचार गरी मतदान गर्ने अवसर प्रदान गर्ने अपेक्षा गरिएको छ।
यस अवधिमा निर्वाचन व्यवस्थापन, सुरक्षा बन्दोबस्त, मतदान केन्द्र तयारी तथा शान्ति–सुरक्षा अवस्थाको मूल्याङ्कन जस्ता कार्यलाई प्राथमिकता दिइन्छ। विश्वका कतिपय देशमा २४ देखि ७२ घण्टासम्म मौन अवधि तोक्ने चलन रहेको छ।
आयोगले उम्मेदवार, दल र सम्बन्धित सबैलाई मौन अवधिमा आचारसंहिता कडाइका साथ पालना गर्न आग्रह गरेको छ।
