विराटनगर – प्रतिनिधि सभा निर्वाचन नजिकिँदै गर्दा मोरङ क्षेत्र नम्बर ६ मा राष्ट्रिय स्वतन्त्र पार्टी (रास्वपा) प्रति आकर्षण बढेको देखिएको छ। सुन्दरहरैँचा नगरपालिका–४ का प्रभावशाली व्यक्तित्व नबिन दाहाल र चन्द्र कोइरालासहित सयौं व्यक्तिहरू रास्वपामा प्रवेश गरेका छन्।
फागुन ११ गते राति आयोजित कार्यक्रममा प्रतिनिधि सभा सदस्य उम्मेदवार रुबिना आचार्यले नवप्रवेशीहरूलाई खादा र ब्याच लगाएर स्वागत गरिन्।
लायन्स क्लब अफ सुन्दरदुलारीका अध्यक्ष तथा नेकपाका पूर्व प्रदेश कमिटी सदस्य चन्द्र कोइराला र गछिया खानेपानीका पूर्व स्वतन्त्र उम्मेदवार नबिन दाहालको प्रवेशलाई अर्थपूर्ण रूपमा हेरिएको छ। दाहाल गत प्रदेशसभा निर्वाचनमा जीवन आचार्यसँग प्रतिस्पर्धा गर्दै चर्चामा आएका थिए।
लामो समय स्वतन्त्र छवि बनाएका दाहाल र कम्युनिस्ट पृष्ठभूमिका कोइरालाको आगमनले सुन्दरहरैँचाको राजनीतिक समीकरणमा नयाँ तरङ्ग ल्याएको स्थानीयहरूको भनाइ छ। निर्वाचनको मुखमा भएको यो ध्रुवीकरणले रास्वपाको पक्षमा माहोल थप मजबुत बन्ने आकलन गरिएको छ।
