विराटनगर– मोरङ क्षेत्र नं. ६ मा यतिबेला चुनावी माहोल तातेको छ। तर यो चुनावी दौडबीच नेपाल कम्युनिस्ट पार्टी (एमाले)का उम्मेदवार विनोद ढकालका लागि समय दोहोरो पीडाको क्षण बनेको छ।
एकातर्फ १०१ वर्षको उमेरमा दिवंगत बुवा विष्णुप्रसाद ढकालको वियोग, अर्कोतर्फ फागुन २१ गते हुने प्रतिनिधिसभा निर्वाचनको जिम्मेवारी।
ढकाल हिन्दु संस्कारअनुसार १३ दिने काजकिरियामा बसेका छन्। घरभित्र धार्मिक विधि चलिरहँदा उनको मन भने मतदातामाझ पुग्न नसकेको पीडामा छ।
केही दिनअघि कोराभित्रबाटै एक भिडियो सन्देशमार्फत उनले मतदातालाई सम्बोधन गरे। “म शारीरिक रूपमा तपाईंहरूको माझमा आउन नसके पनि मेरो मन तपाईंहरूसँगै छ। बुबाको शोक र तपाईंहरूको माया दुवै मेरा लागि उत्तिकै महत्वपूर्ण छन्,” उनले भने।
उम्मेदवार कोरामा बसेपछि चुनावी अभियान सुस्त हुन्छ कि भन्ने धेरैको अनुमान थियो। तर ढकाल परिवारमा त्यो अनुमान गलत सावित भएको देखिन्छ।
ढकालको अनुपस्थितिमा उनका दुई छोरीहरू घरदैलो अभियानमा सक्रिय बनेका छन्। ‘जेन–जी’ पुस्ताका उनीहरूले भावनात्मक संवेदनशीलता र आधुनिक सोचलाई जोड्दै अभियान अघि बढाइरहेका छन्।
इटालीमा सस्टेनेबल नेचुरल रिसोर्स म्यानेजमेन्टमा स्नातकोत्तर अध्ययनरत जेठी छोरी सुरभी र हालै बीएलएलबी उत्तीर्ण गरेकी कान्छी छोरी सौरभी राजनीतिक चेतसहित मैदानमा उत्रिएका छन्।
दुवै छोरी बिहानै उठेर बुवाको आशीर्वाद लिँदै प्रतिबद्धता पत्र बोकेर मतदाताको घर–घर पुगिरहेका छन्। उनीहरूको हातमा केवल प्रतिबद्धता पत्र मात्रै छैन, बुवाको संघर्ष र इमानको कथा पनि छ। घरदैलोमा पुगेर उनीहरू भन्छन्, “हाम्रो बुबा अहिले तपाईंहरूको अँगनमा आउन सक्नुभएन, उहाँको तर्फबाट हामी आएका छौँ। उहाँको सपना पूरा गर्न साथ दिनुहोला।”
पितृशोकको घडीमा छोरीहरूले देखाएको परिपक्वता र समर्पणले चुनावी माहोलमा भावनात्मक आयाम थपेको छ। बुवाको राजनीतिक परीक्षामा छोरीहरू नै ‘सारथि’ बनेका छन्।
