विराटनगर । आगामी फागुन २१ गते हुने निर्वाचन नजिकिँदै जाँदा मोरङ प्रतिनिधिसभा क्षेत्र नं. ५ मा राजनीतिक सरगर्मी बढेको छ। दल तथा स्वतन्त्र उम्मेदवारहरूले चुनावी प्रचारप्रसार अभियानलाई तीव्रता दिएका छन्।
यसैबीच राष्ट्रिय उर्जाशील पार्टी, नेपालले संगठन विस्तार तथा जनपरिचालन अभियानलाई तीव्र बनाउँदै मोरङको रंगेली नगरपालिकाको रंगेली बजार र धनपालथान गाउँपालिकाको कर्सिया बजारमा सम्पर्क कार्यालय स्थापना गरेको छ। यसअघि विराटनगरको रानी क्षेत्रमा मुख्य चुनावी कार्यालय स्थापना गरिएको थियो।
पार्टीका केन्द्रीय अध्यक्ष तथा मोरङ–५ का प्रतिनिधिसभा सदस्य उम्मेदवार योगेन्द्र मण्डलले दुवै कार्यालयको उद्घाटन गरेका हुन्। २०७९ सालको आम निर्वाचनमा सोही क्षेत्रबाट स्वतन्त्र उम्मेदवारका रूपमा निर्वाचित मण्डलले ‘जेनजी’ आन्दोलनको भावना र जनचाहनालाई समेट्दै आफ्नै नेतृत्वमा राष्ट्रिय उर्जाशील पार्टी गठन गरेका थिए।
नयाँ सोचको संकल्प
रंगेलीमा आयोजित उद्घाटन समारोहलाई सम्बोधन गर्दै अध्यक्ष मण्डलले नयाँ सोच, नयाँ नेतृत्व र परिवर्तनको दृढ संकल्पसहित अघि बढेको बताए। उनले नेपालवादको सिद्धान्तलाई आत्मसात गर्दै एकता, आशा र पारदर्शिताको राजनीति गर्ने प्रतिबद्धता व्यक्त गरे।
कर्सिया बजारमा आयोजित सभामा उनले जनताले गरेको विश्वासलाई कर्ममार्फत प्रमाणित गर्ने अठोट दोहोर्याए। “स्वतन्त्र सांसदका रूपमा सुरु गरेका अभियानलाई अब पार्टीगत शक्तिका साथ पूरा गर्नु मेरो लक्ष्य हो,” उनले भने।
दुवै कार्यक्रममा स्थानीय युवा, किसान, महिला तथा विभिन्न पेसाकर्मीहरूको उल्लेख्य सहभागिता रहेको थियो। सो अवसरमा विभिन्न दल परित्याग गरी सयौं स्थानीय नेता तथा कार्यकर्ताहरू राष्ट्रिय उर्जाशील पार्टीमा प्रवेश गरेका जनाइएको छ। नवप्रवेशीलाई स्वागत गर्दै अध्यक्ष मण्डलले युवाको जोस र अनुभवी पुस्ताको अनुभवलाई समेटेर पार्टीलाई अघि बढाइने बताए।
