विराटनगर । नेपाली कांग्रेसबाट सुनसरी निर्वाचन क्षेत्र नम्बर ४ का उम्मेदवार ज्ञानेन्द्रबहादुर कार्कीले नेकपा एमालेकी नेतृ सवितादेवी मेहतासहित ५० जनालाई पार्टी प्रवेश गराएका छन् । चुनावको मुखैमा एमालेमा ‘पहिरो ल्याउँदै’ कार्कीले मंगलबार उनीहरूलाई पार्टीमा स्वागत गरेका हुन् ।
सुनसरीको भोक्राहा नरसिंह गाउँपालिकामा २०७९ को स्थानीय तह निर्वाचनमा एमालेबाट उपाध्यक्ष पदमा चुनाव लडेकी भोक्राहा नरसिंह गाउँपालिकाकी मेहतासहित ५० जनाभन्दा बढीले नेकपा एमाले परित्याग गरेका हुन् ।
कांग्रेसमा समाहित भएपछि मेहताले एमाले पार्टीमाथि बढेको वितृष्णा र आम जनताको एमालेप्रतिको मनोभावना बद्लिएका कारण एमाले यस्तो निर्णय लिएको बताइन् । उनीहरूलाई अबिर र खादा लगाएर पार्टीमा स्वागत गरेका कार्कीले रूपान्तरित कांग्रेसमा समाहित हुँदा आफूलाई खुसी मिलेको बताए ।
कांग्रेसका नेता ‘ह्याट्रिक’ जितको खोजी गर्दै प्रतिनिधिसभा सदस्य निर्वाचनमा तेस्रो पटक सुनसरी ४ बाट उम्मेदवार बनेका छन् । यसअघि कार्कीले प्रतिनिधिसभा निर्वाचन २०७९ मा एमालेका जगदीशप्रसाद कुसियैतलाई मात्र ११० मतान्तरले हराएका थिए । त्यसभन्दा अघि २०७४ सालको निर्वाचनमा भने उनी आफ्ना निकटतम् प्रतिद्वन्द्वी एमालेकै रमेश श्रेष्ठमाथि झन्डै सात हजार मतान्तरको जित दर्ता गर्न सफल भएका थिए ।
अब, तेस्रो पटक संघीय सांसद बनेर सुनसरी–४ को सर्वांगीण विकास गर्ने लक्ष्य लिएर चुनावी मैदानमा होमिएका कार्कीले मुख्य रूपमा पुनः एमालेका कुसियैत र नेपाली कम्युनिस्ट पार्टीका महमद महफुज अन्सारीसँग प्रतिस्पर्धा गर्दै छन् ।
कार्की अर्थमन्त्री, ऊर्जा जलस्रोत तथा सिँचाइमन्त्री, कानुन, न्याय तथा संसदीय मामिलामन्त्री र सञ्चार तथा सूचना प्रविधिमन्त्री भएर जिम्मेवारी बहन गरिसकेका व्यक्ति हुन् । कांग्रेसको विशेष महाधिवेशनपछि निवर्तमान केन्द्रीय सदस्य हुन् ।
