काठमाडौं — राष्ट्रिय स्वतन्त्र पार्टी (रास्वपा)का सभापति रवि लामिछाने विरुद्ध दायर सम्पत्ति शुद्धीकरण र संगठित अपराधसम्बन्धी मुद्दा तत्काल फिर्ता नहुने भएको छ।
सोमबार जिल्ला अदालत कास्कीका न्यायाधीश नितिश राईको इजलासले मुद्दा फिर्तासम्बन्धी निवेदनमाथि सुनुवाइ गर्दै सर्वोच्च अदालतबाट निर्णय नभएसम्म मुद्दा फिर्ता गर्न नसकिने आदेश दिएको हो।
यसअघि महान्यायाधिवक्ता सविता भण्डारी ले पुस ३० गते लामिछानेविरुद्धको मुद्दा फिर्ता लिने निर्णय गर्दै जिल्ला सरकारी वकिलको कार्यालयलाई परिपत्र गरेकी थिइन्। सोही आधारमा जिल्ला सरकारी वकिलको कार्यालय कास्कीले जिल्ला अदालतमा मुद्दा फिर्ताका लागि निवेदन दिएको थियो।
तर उक्त निर्णयविरुद्ध युवराज पौडेल (युवराज सफल)ले माघ २ गते सर्वोच्च अदालत मा रिट दायर गरेका थिए। सुनुवाइका क्रममा महान्यायाधिवक्ताले मुद्दा दर्तापछि थप प्रमाण फेला परेकाले फिर्ता लिने निर्णय गरिएको उल्लेख गरेकी थिइन्।
सर्वोच्च अदालतले थप प्रमाण पेस गर्न आदेश दिएको छ। आदेशअनुसार प्रमाण पेस भएपछि सर्वोच्चमा पुनः सुनुवाइ हुनेछ।
लामिछानेविरुद्ध काठमाडौं, कास्की, चितवन र रुपन्देहीलगायत जिल्लामा मुद्दा दायर रहेका छन्।
