विराटनगर । मोरङ निर्वाचन क्षेत्र नम्बर २ का प्रतिनिधिसभा सदस्यका उम्मेदवार डा. मीनेन्द्र रिजाललाई विद्वान उम्मेदवारका रूपमा हेरिन्छ । अमेरिकाको न्युयोर्क युनिभर्सिटीबाट व्यवस्थापन विषयमा पिएचडी गरेर सोही विश्वविद्यालयमा तीन वर्ष पढाएका रिजाल यो क्षेत्रका लागि सर्वाधिक पढेलेखेका उम्मेदवार हुन् ।
तर, उनै विद्वान उम्मेदवार रिजालले विपक्षीप्रति रुखो व्यवहार प्रस्तुत गर्दै ‘हेट स्पिच’ दिने गरेका छन् । आफ्ना एजेन्डाबारे मतदातासँग छलफल गर्नुपर्ने समयमा रिजालले अन्य प्रतिद्वन्द्वी द्वेषपूर्ण अभिव्यक्ति दिँदै दोहोरो चरित्र देखाएका हुन् ।
निर्वाचन क्षेत्रका विभिन्न स्थानमा छलफल–भेटघाटलाई तीव्रता दिनेक्रममा रिजाल चुनावी प्रतिस्पर्धीद्वय रास्वपाका कृष्ण कार्की र एमालेका दिलीप बगडियामाथि कटु आलोचनामा उत्रिएका हुन् । उनले रास्वपा जेनजी आन्दोलनका क्रममा सरकारी संरचनामा आगो लगाउन उद्दत देखिएको आरोप लगाएका छन् ।
‘देशमा आक्रोश छ र निराशा छ । यो हामीले स्वीकार्नै पर्छ । तर, आगो लगाएर देश बन्दैन, संसद जलाएर, वडा कार्यालयसमेत जलाएर देश बन्दैन,’ उनले भनेका छन् । यसै सिलसिलालाई लिएर तत्कालीन प्रधानमन्त्री केपी शर्मा ओलीले अटेरी गरेर मट्टीतेल खन्याएको र आगो सल्काउने काम अर्कैले गरेको रिजालको तर्क छ ।
रास्वपा सभापति रवि लामिछाने ठुला पार्टीसँग गठबन्धन गर्दै सत्तामा पुग्ने गरेको आरोप लगाउँदै उनले वरिष्ठ नेता बालेन साह पार्टीहरूलाई गाली गरेर अहिले दलबाटै चुनावमा होमिएको टिप्पणी गरेका छन् । अझ कार्यसम्पादन मूल्यांकनका हिसाबले काठमाडौंलाई अन्तिम बनाएका निवर्तमान मेयर अहिले प्रधानमन्त्रीका लागि अगाडि सर्नु हास्यास्पद भएको भन्दै आलोचना गरेका छन् ।
रिजालले एमाले उम्मेदवार बगडियाको पनि विरोध गरेका छन् । रंगेलीको विकास देखाएर क्षेत्र जित्न खोजेको भन्दै रिजालले बगडियामाथि धावा बोल्न खोजेका छन् । दुई कार्यकालको आठ वर्षमा पनि रंगेलीको विकासमा अपेक्षित काम गर्न नसकेको आरोप रिजालको छ ।
जेनजी विद्रोहलाई बुझेर नेपाली कांग्रेस चुनावमा होमिएको बताउने गरेका डा. रिजालको यो तर्क भने दोहोरो चरित्रमा आधारित छ । उनले देश जलाउन आगो लगाउने र लगाउन प्रेरित गर्ने दुवै पक्षबाट देशलाई जोगाउन कांग्रेस चुनावमा होमिएको जनाउँदै आफ्नो उम्मेदवारी मोरङ–२ मा रहेको जनाएका थिए ।
जबकि, कांग्रेस सभापति गगनकुमार थापाले जेनजी विद्रोह परिवर्तनका लागि जायज रहेको टिप्पणी यसअघि नै दिइसकेका छन् । अझ, गत भदौ २३ र २४ गते भएको जेनजी आन्दोलनमा उनी आबद्ध कांग्रेसकै रमेश लेखक गृहमन्त्री थिए । त्यसबेला तत्कालीन सभापति शेरबहादुर देउवा खेमामा रहेका रिजाल विशेष महाधिवेशनपछि सभापति थापासँग टिकट मागेर चुनावमा होमिएका हुन् ।
यसअघि पनि दुई पटक यहाँबाट जितेर विभिन्न मन्त्रालय हाँकेका उनलाई क्षेत्रबासीले टुरिस्ट उम्मेदवारको ट्याग भिराउने गरेका छन् । माधवकुमार नेपाल नेतृत्वको मन्त्रीमण्डलमा संस्कृतिमन्त्री, सुशील कोइरालाको मन्त्रिपरिषद्मा सूचना तथा सञ्चार मन्त्री रहेका रिजालले शेरबहादुर देउवा प्रधानमन्त्री छँदा रक्षामन्त्री बन्ने मौका पाएका थिए ।
तीन–तीन पटक मन्त्री बन्दा पनि क्षेत्रगत विकासमा चासो नदेखाएको र चुनावपछि गाउँ नै नटेकेको भन्दै रिजाललाई मतदाताले टुरिस्ट उम्मेदवार भन्ने गरेका हुन् । त्यसबाहेक निर्वाचनअघि रिजालले मोरङ–२ का मतदातालाई जनाएका प्रतिबद्धताहरू मन्त्री बन्दासमेत पूरा गर्न नसकेकोमा मतदाता निराश छन् ।
मोरङ–२ का मतदाताहरू विकास, रोजगार र समृद्धिको ठोस योजना सुन्न चाहन्छन् । विद्वान भनिएका उम्मेदवारबाट विरोधको राजनीतिभन्दा माथि उठेर दूरदर्शी एजेन्डा प्रस्तुत गर्ने अपेक्षा मतदाताले राखेका छन् । तर, अहिलेसम्मको चुनावी अभियानमा रिजालको ध्यान आफ्नो भविष्यको कार्यक्रम भन्दा प्रतिद्वन्द्वीको आलोचनामा बढी केन्द्रित देखिएको छ ।
विद्वताको प्रमाणपत्र मात्रले मतदाताको मन जित्न नपुग्ने र जनताले विकासको नक्सा देख्न चाहेका बेला आरोपको बाजार थाप्नु कति बुद्धिमानी हो भन्ने प्रश्न अब मतदाता स्वयंले चुनावको दिन मतपत्रमार्फत जवाफ दिनेछन् ।
