विराटनगर — हिक्मत कुमार कार्की ले कोशी प्रदेश सरकारले स्थापनाको आठौँ वर्षमा उल्लेख्य प्रगति गरेको बताएका छन्।
आज प्रदेश सरकारको स्थापना दिवसका अवसरमा शुभकामना सन्देश जारी गर्दै उनले प्रदेशमा महत्वपूर्ण काम भए पनि त्यसलाई नजरअन्दाज गरी नकारात्मक प्रचार गरिएको टिप्पणी गरे। नेपालको संविधान २०७२ जारी भएपछि २०७४ साल मंसिरमा प्रदेशसभा निर्वाचन सम्पन्न भई फागुन ३ गते सरकार गठन भएको र आज नवौँ वर्षमा प्रवेश गरेको उनले उल्लेख गरेका छन्।
मुख्यमन्त्री कार्कीले संघीय लोकतान्त्रिक गणतन्त्रात्मक व्यवस्थाअनुसार प्रदेश सरकार सञ्चालन हुँदै छोटो अवधिमै भौतिक पूर्वाधार, सामाजिक विकास तथा नागरिकको जीवनस्तर उकास्ने क्षेत्रमा महत्वपूर्ण उपलब्धि हासिल गरिएको दाबी गरे।
प्रदेश संरचनामाथि प्रहार हुने गरेको उल्लेख गर्दै उनले पारदर्शिता, जवाफदेहिता, जनमुखी सेवा र सुशासनलाई प्राथमिकतामा राखेर सरकार अघि बढिरहेको बताए। संघीय सरकारसँग सहकार्य, समन्वय र सहअस्तित्वका आधारमा आवश्यक कानुन निर्माण तथा कार्यान्वयनमा जोड दिइएको पनि उनले बताए।
लगानी सम्मेलनमार्फत करिब दुई खरब रुपैयाँ बराबरको लगानी प्रतिबद्धता प्राप्त भई कार्यान्वयन चरणमा जानु महत्वपूर्ण उपलब्धि भएको उनको भनाइ छ। साथै पर्यटन वर्ष घोषणा, पदमार्ग निर्माण, सडक सञ्जाल विस्तार र पुल निर्माणलाई प्राथमिकतामा राखिएको उल्लेख गरिएको छ।
मुख्यमन्त्री कार्कीले कोशी प्रदेश सरकारलाई देखिने, सुन्ने र अनुभूति गर्न सकिने ‘जनताको सरकार’का रूपमा स्थापित गर्ने प्रतिबद्धता व्यक्त गरेका छन्।
