मोरङ — मोरङको गोठगाउँस्थित पूर्वाञ्चल विश्वविद्यालयमा आयोजित दुईदिने अन्तर्राष्ट्रिय सम्मेलन भव्य रूपमा सम्पन्न भएको छ। शैक्षिक अनुसन्धान र अन्तर्राष्ट्रिय सहकार्यलाई प्रवर्द्धन गर्ने उद्देश्यले आयोजित सम्मेलनमा १९४ वटा अनुसन्धानमूलक लेख प्रस्तुत गरिएको आयोजकले जनाएको छ।
सम्मेलनमा कला, कानुन तथा शिक्षा, व्यवस्थापन, इन्जिनियरिङ, विज्ञान तथा प्रविधि र मेडिसिन एन्ड हेल्थ साइन्स गरी पाँच प्रमुख विषयगत थिममा समानान्तर सत्र सञ्चालन गरिएको थियो। स्वदेश तथा विदेशबाट सहभागी प्राध्यापक, अनुसन्धानकर्ता र विज्ञहरूले आ–आफ्ना अध्ययन तथा अनुसन्धानका निष्कर्ष प्रस्तुत गर्दै समसामयिक चुनौती, नवप्रवर्तन र समाधानका उपायबारे गहन छलफल गरेका थिए।
विश्वविद्यालयका उपकुलपति बिजु कुमार थपलियाले सम्मेलनले शैक्षिक उत्कृष्टता अभिवृद्धि गर्न तथा अनुसन्धानलाई व्यवहारिक विकाससँग जोड्न महत्वपूर्ण योगदान पुर्याउने बताए। उलेन यस्ता अन्तर्राष्ट्रिय सम्मेलनले ज्ञान, अनुभव र प्रविधिको आदानप्रदानमार्फत विश्वविद्यालयको अन्तर्राष्ट्रिय पहिचान थप सुदृढ हुने विश्वास व्यक्त गरे।
सम्मेलनबाट विकास व्यवस्थापन, दिगो वातावरण संरक्षण, स्वास्थ्य सेवा सुधार तथा अन्तर्राष्ट्रिय सम्बन्ध विस्तारका क्षेत्रमा नीतिगत र व्यवहारिक सुझाव प्राप्त भएको जनाइएको छ। सहभागीहरूले यस्ता कार्यक्रमलाई निरन्तरता दिँदै अनुसन्धान–केन्द्रित शैक्षिक वातावरण निर्माण गर्नुपर्नेमा जोड दिएका छन्।
