बुटवल– राष्ट्रिय स्वतन्त्र पार्टी (रास्वपा) का सभापति रवि लामिछाने आइतबार साँझ रुपन्देही आइपुगेका छन्। उनी मणिग्रामस्थित तारे होटल विश्राम बाटिकामा बसेका छन्।
रास्वपाका अनुसार सोमबार लामिछानेले रुपन्देहीका पाँचै निर्वाचन क्षेत्रमा जनसम्पर्क कार्यक्रम सञ्चालन गर्नेछन्। बिहान ८ बजे निर्वाचन क्षेत्र नं. १ अन्तर्गत देवदहको खैरेनीबाट जनसम्पर्क अभियान सुरु भएको पार्टीले जनाएको छ।
रास्वपा रुपन्देहीका सभापति डा. बुद्धिप्रसाद शर्माका अनुसार लामिछानेले दिनभर पाँच निर्वाचन क्षेत्रका २६ स्थानमा पुग्ने कार्यक्रम तय भएको छ। बिहान ११ बजे क्षेत्र नं. ३ को भैरहवा, दिउँसो १ बजे क्षेत्र नं. ४ को कोटहीमाई–मर्चवार क्षेत्र, २ बजे क्षेत्र नं. ५ को पर्सहवा, सवा ३ बजे क्षेत्र नं. २ को मोतिपुर हुँदै बुटवल, नयाँगाउँ र सालझण्डी हुँदै सवा ६ बजे बुद्ध जन्मस्थल लुम्बिनी तथा मायादेवी मन्दिर पुग्ने कार्यक्रम रहेको छ।
यद्यपि सबै स्थानमा सम्बोधन नहुने र केही चयनित स्थानमा मात्र छोटो सम्बोधन हुने शर्माले जानकारी दिए।
रुपन्देहीका पाँच निर्वाचन क्षेत्रमा रास्वपाबाट क्रमशः क्षेत्र नं. १ मा महामन्त्री सुनिल लम्साल, क्षेत्र नं. २ मा सुलभ खरेल, क्षेत्र नं. ३ मा डा. लेखजंग थापा, क्षेत्र नं. ४ मा कन्हैया बनिया र क्षेत्र नं. ५ मा तौफिफ अहमद खान उम्मेदवार रहेका छन्।
रुपन्देहीको कार्यक्रम सकेपछि रवि लामिछाने सोमबार राति कपिलवस्तु प्रस्थान गर्ने कार्यक्रम तय भएको छ।
