टी–२० विश्वकप क्रिकेटमा न्यूजिल्यान्डले विजयी सुरुआत गरेको छ। भर्खरै सम्पन्न खेलमा न्यूजिल्यान्डले अफगानिस्तानलाई ५ विकेटले पराजित गर्दै प्रतियोगितामा प्रभावशाली सुरुआत गरेको हो।
१८३ रनको चुनौतीपूर्ण लक्ष्य न्यूजिल्यान्डले १७.५ ओभरमै ५ विकेट गुमाएर पूरा गर्यो। यो टी–२० विश्वकप इतिहासमा न्यूजिल्यान्डले सफलतापूर्वक पछ्याएको सबैभन्दा ठूलो लक्ष्य हो। यसअघि न्यूजिल्यान्डले सन् २०२१ मा अबुधाबीमा इङ्गल्याण्डविरुद्ध १६७ रनको लक्ष्य पछ्याएको थियो।
न्यूजिल्यान्डको जितमा टिम शेफर्टले विष्फोटक ब्याटिङ प्रदर्शन गरे। उनले ४२ बलमा ६५ रन जोड्दै टोलीलाई जिततर्फ डोर्याए। यस्तै, ग्लेन फिलिप्सले ४२, मार्क चापम्यानले २८ रन बनाए। डेरिल मिचेल २५ रनमा आउट हुँदा मिचेल सान्टनर १४ रनमा नटआउट रहे।
अफगानिस्तानका बलरमध्ये मुजीब रहमानले दुई विकेट लिए भने अजमुतल्लाह ओमारजाइ, राशिद खान र मोहम्मद नाबीले एक–एक विकेट हात पारे।
यसअघि चेन्नईस्थित एमए चिदम्बरम रंगशालामा टस जितेर पहिले ब्याटिङ गरेको अफगानिस्तानले २० ओभरमा ६ विकेट गुमाउँदै १८२ रन बनाएको थियो। अफगानिस्तानका लागि गुलबदिन नइबले उत्कृष्ट अर्धशतकीय पारी खेले। उनले ३५ बलमा ६३ रन बनाए।
त्यसैगरी सेदिकुल्लाह अटलले २९, रहमानुल्लह गुरबाजले २७, डार्विस रसुलीले २० तथा अजमुतल्लाह ओमारजाइले १४ रनको योगदान दिए। बलिङतर्फ न्यूजिल्यान्डका लोकी फर्ग्युसनले दुई विकेट लिए भने म्याट हेनरी, रचिन रविन्द्र र जेकोब डफीले एक–एक विकेट लिए।
