विराटनगर । कोशी प्रदेश सभाको आठौँ अधिवेशन आजबाट सुरु हुने भएको छ। विराटनगरस्थित वीरेन्द्र सभागृहमा दिउँसो २ बजेदेखि प्रदेश सभाको बैठक बस्नेछ।
कोशी प्रदेश सरकारको सिफारिसमा प्रदेश प्रमुख परशुराम खापुङले हिउँदे अधिवेशन आह्वान गरेका हुन्। प्रदेश सभाको यस अधिवेशनमा समसामयिक राजनीतिक विषय, प्रदेश सरकारका नीति तथा कार्यक्रम, विधेयकहरू र जनसरोकारका विषयमा छलफल हुने अपेक्षा गरिएको छ।
यसअघि भदौ २४ गते जेन–जी आन्दोलनका क्रममा कोशी प्रदेश सभाको भवनमा आगजनी हुँदा मुख्य सभाभवन पूर्ण रूपमा क्षतिग्रस्त भएको थियो। सभाभवन प्रयोगयोग्य नरहेपछि यसपटक अधिवेशन अस्थायी रूपमा वीरेन्द्र सभागृहमा सारेर सञ्चालन गर्न लागिएको हो।
प्रदेश सभा सचिवालयका अनुसार बैठक सञ्चालनका लागि आवश्यक भौतिक संरचना, सुरक्षा व्यवस्था तथा सञ्चार व्यवस्थापनका सम्पूर्ण तयारी पूरा गरिएको छ। अधिवेशन अवधिभर प्रदेशसभा सदस्यहरूलाई आवश्यक सहजीकरणका व्यवस्था मिलाइएको सचिवालयले जनाएको छ।
