काठमाडौं । नेपाली कांग्रेसका सभापति गगनकुमार थापाले पार्टीको बदलिएको स्वास्थ्य योजना सार्वजनिक गरेका छन्। सामाजिक सञ्जालमा सक्रिय थापाले भिडियो सन्देशमार्फत कांग्रेसको स्वास्थ्यसम्बन्धी दृष्टिकोण र योजना प्रस्तुत गरेका हुन्।
उनले स्वास्थ्य बीमाको कार्यक्रम हाल अस्तव्यस्त अवस्थामा रहेको उल्लेख गर्दै त्यसलाई सुधार र एकीकृत गर्नुपर्ने आवश्यकता औँल्याए। कुनै पनि नेपाली पैसा नभएकै कारण उपचारबाट वञ्चित हुन नपर्ने अवस्था सुनिश्चित गर्ने कांग्रेसको लक्ष्य रहेको उनले बताए।
‘अहिले स्वास्थ्य बीमाको कार्यक्रम अस्तव्यस्त छ, यसलाई सुधार गर्न आवश्यक छ,’ थापाले भने, ‘जुन सोचका आधारमा यो कार्यक्रम ल्याइएको हो, त्यही आधारमा अघि बढाइनेछ। स्वास्थ्य बीमालाई राष्ट्रिय गौरवको आयोजनाका रूपमा अघि बढाउँछौं।’
सभापति थापाले सबै नागरिकले स्वास्थ्य बीमामा आबद्ध हुनुपर्नेमा जोड दिँदै सबै स्वास्थ्य कार्यक्रमलाई एकीकृत गरी प्रणालीगत सुधार गर्न आवश्यक रहेको बताए।
‘पैसा नभएकै कारण कुनै पनि नेपाली उपचारबाट वञ्चित हुने छैनन्,’ उनले भने, ‘स्वास्थ्य बीमामा आवश्यक सुधार गर्दै हरेक नागरिकलाई समेट्ने हाम्रो सङ्कल्प हो।’
बीमाका कारण उपचारका लागि कसैले घर–जग्गा बेच्नुपर्ने अवस्था नआउने उल्लेख गर्दै उनले स्वास्थ्य क्षेत्रको दायित्व सरकारकै रहेको स्पष्ट पारे।
