काठमाडौं । सामाजिक सञ्जाल तथा केही अनलाइन सञ्चारमाध्यममार्फत सर्वसाधारण र मतदातासँग ‘कसलाई मतदान गर्नुहुन्छ?’ भनी प्रश्न गरेर मतदाताको गोपनीयता भंग गरिएको भन्दै जिल्ला निर्वाचन कार्यालय काठमाडौंले आपत्ति जनाएको छ।
निर्वाचन कार्यालयले निर्वाचन आचारसंहिता, २०८२ को पूर्ण पालना गर्न ध्यानाकर्षण गराउँदै मतदाताको गोपनीयता भंग गर्ने कुनै पनि कार्य नगर्न तथा नगराउन आग्रह गरेको छ।
आचारसंहिताको दफा ४ बमोजिम त्यस्ता कार्यहरू आचारसंहिता उल्लङ्घनको दायरामा पर्ने उल्लेख गर्दै, यस्ता गतिविधि नरोकिने हो भने प्रचलित कानुनअनुसार कारबाही प्रक्रिया अघि बढाइने चेतावनी पनि दिइएको छ।
निर्वाचन कार्यालयका अनुसार उम्मेदवारको अन्तिम नामावली प्रकाशन भएपछि मतदान हुने दिनभन्दा १७ दिनअघिदेखि मात्र निर्वाचन प्रचारप्रसार गर्न पाइने व्यवस्था छ। सो अवधिमा जुलुस, आमसभा वा कोणसभा गर्न, सञ्चारमाध्यममार्फत प्रचार सामग्री प्रकाशन तथा प्रसारण गर्न तथा घरदैलो कार्यक्रम गर्न पाइने प्रावधान रहेको छ।
आचारसंहिताका यी व्यवस्थाबारे पटक–पटक छलफल, अन्तर्क्रिया तथा सूचना प्रकाशनमार्फत जानकारी गराइसकिए पनि केही राजनीतिक दल, तिनका प्रतिनिधि र उम्मेदवारबाट उल्लङ्घन भइरहेको निर्वाचन कार्यालयले जनाएको छ।
निर्धारित समयअगावै कोणसभा गर्ने, प्रचारप्रसार गर्ने, प्रचार सामग्री प्रकाशन तथा प्रसारण गर्ने तथा घरदैलो कार्यक्रममार्फत मतदातालाई प्रभाव पार्ने कार्य भइरहेको भन्ने जानकारी प्राप्त भएकाले त्यस्ता गतिविधि नगर्न निर्वाचन कार्यालयले पुनः ध्यानाकर्षण गराएको छ।
यदि कसैबाट आचारसंहिता उल्लङ्घन गरी कुनै पनि माध्यमबाट प्रचारप्रसार गरेको प्रमाण फेला परेमा प्रचलित कानुनअनुसार तत्काल कारबाही प्रक्रिया अघि बढाइने निर्वाचन कार्यालयले जनाएको छ।
आचारसंहिता अनुगमन अधिकृतहरू मुक्तिराम रिजाल, शिवराम भट्टराई, रोमाकान्त काफ्ले, मुनकुमार केसी, सुनिता सुवेदी र रुक्मागत अर्यालले संयुक्त रूपमा निर्वाचन आचारसंहिताका सम्पूर्ण पक्षमा सबैलाई सचेत रहन आग्रह गरेका छन्।
