काठमाडौं । सरकारले आसन्न प्रतिनिधिसभा सदस्य निर्वाचनका क्रममा ड्रोनको प्रयोगमा प्रतिबन्ध लगाएको छ।
केन्द्रीय सुरक्षा समितिले निर्वाचनमा ड्रोन प्रयोगमा प्रतिबन्ध लगाउने निर्णय गरिसकेको जानकारी गृह मन्त्रालयका प्रवक्ता तथा सहसचिव आनन्द काफ्लेले दिए। सामाजिक सञ्जालको दुरुपयोग बढ्दो क्रममा रहेकाले त्यसलाई नियन्त्रण गर्न नेपाल प्रहरीले सञ्चालनमा ल्याएको अध्याधुनिक युनिटलाई थप प्रभावकारी बनाइने पनि उनले बताए।
उनका अनुसार निर्वाचन आचारसंहिता उल्लङ्घन हुने गरी मिथ्या, भ्रमपूर्ण सूचना तथा घृणास्पद अभिव्यक्ति दिने व्यक्तिहरूको निगरानीका लागि विशेष टोली परिचालन गरिएको छ। निर्वाचन विरोधी गतिविधिमा संलग्न हुनेलाई कानुनी दायरामा ल्याउन सुरक्षा संयन्त्रले चुस्त निगरानी गरिरहेको काफ्लेले स्पष्ट पारे।
त्यस्तै, निर्वाचन प्रहरीको बीमाको व्यवस्था, सञ्चार सम्पर्क नहुने मतदानस्थलको पहिचान तथा आवश्यक प्रबन्ध मिलाउने तयारीसमेत भइरहेको उनले जानकारी दिए। गृह मन्त्रालयले सबै सुरक्षा संयन्त्र र प्रशासनिक निकायलाई निर्वाचन सुरक्षामा कुनै कमजोरी नदेखिने गरी उच्च सतर्कता अपनाउन निर्देशन दिइसकेको छ।
गृहमन्त्री ओमप्रकाश अर्यालले एकीकृत निर्वाचन सुरक्षा योजना–२०८२ अनुसार जिम्मेवार निकायहरूले गरिरहेका कार्य, जनशक्ति परिचालन तथा बन्दोबस्तीको योजनाको समीक्षा गर्दै सुरक्षा व्यवस्था अझ प्रभावकारी बनाउन निर्देशन दिएको पनि प्रवक्ता काफ्लेले बताए।
मन्त्रालयले सामाजिक सञ्जाल प्रयोगमा सचेत रहन अनुरोध गर्दै मिथ्या, भ्रमपूर्ण तथा कसैलाई लाञ्छना लगाउने सामग्री पोस्ट नगर्न आग्रह गरेको छ। त्यस्ता गतिविधिमा संलग्न भए कानुनी कारबाही गरिने चेतावनीसमेत दिइएको छ।
