काठमाडौँ । राष्ट्रिय प्रजातन्त्र पार्टी (राप्रपा)ले राष्ट्र, राष्ट्रियता, धर्म संस्कृति र नागरिक बचाउ महाअभियान नेपालका संयोजक दुर्गा प्रसाईंलाई विनासर्त रिहा गर्न सरकारसँग माग गरेको छ।
राप्रपाका अध्यक्ष राजेन्द्र लिङ्देनले शनिबार साँझ विज्ञप्ति जारी गर्दै प्रसाईंलाई अबिलम्ब रिहा गर्न आग्रह गरेका हुन्। उनले एउटा व्यक्तिमाथि प्रतिशोध साँधेर पटक–पटक पक्राउ गर्नु अनुचित मात्र नभई नागरिकका संविधान प्रदत्त अधिकारमाथि आघात भएको दाबी गरेका छन्।
विज्ञप्तिमा राज्यले स्वतन्त्रतापूर्वक हिँड्न, डुल्न, बोल्न, लेख्न र शान्तिपूर्ण विरोध गर्न पाउने नागरिकको अधिकार कुण्ठित गरेको उल्लेख छ। फरक मान्यतालाई दबाउने र निरुत्साहित गर्ने नियतले प्रसाईंलाई दुःख दिने काम भएकोप्रति राप्रपाको गम्भीर ध्यानाकर्षण भएको लिङ्देनले जनाएका छन्।
राप्रपाले सरकारलाई प्रसाईंलाई कुनै सर्तबिना तत्काल रिहा गर्न माग गर्दै नागरिक स्वतन्त्रता र अभिव्यक्ति अधिकारको सम्मान गर्न आग्रह गरेको छ।
