काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले नेताले बोलेको कुरा तोकिएको समयमा पूरा नगरे जनताले सजाय दिनुपर्ने बताएका छन्।
चितवनस्थित पोखरा बसको सम्पर्क कार्यालयमा आयोजित कार्यक्रममा बोल्दै उनले प्रतिबद्धता पूरा नगरी नेताहरू हाँसेर हिँड्न नपाउने स्पष्ट पारे।
‘भनेको कुरा पूरा नगर्दा, भाका पूरा नगर्दा जनताले सजाय दिनुपर्छ। बोल्दै हिँड्ने तर काम नगर्ने नेताले यतिकै हाँसेर हिँड्न पाइँदैन,’ उनले भने।
आगामी निर्वाचनलाई लक्षित गर्दै लामिछानेले यसपटक पार्टीले नागरिकसँग प्रत्यक्ष करार गरेर अघि बढ्ने बताए। पार्टी सभापतिको हैसियतले देशका विभिन्न भागमा पुग्नुपर्ने भएकाले चितवन क्षेत्र नं. २ को चुनावी अभियानमा नागरिकलाई आफ्ना प्रतिनिधिका रूपमा काम गर्न आग्रह गरे।
‘यसपटक चितवन मात्र जितेर हुँदैन, देशैभरि जित्नुपर्ने अवस्था छ,’ उनले भने, ‘तपाईंहरू मेरो प्रतिनिधि भएर घर–घरमा पुगिदिनुहोस्, त्यसले मलाई दुर्गम ठाउँमा पुग्ने अवसर दिन्छ।’
लामिछानेले रास्वपाले कम्तीमा पनि एकल बहुमतको सरकार गठन गर्ने लक्ष्य लिएको उल्लेख गर्दै पाँच वर्षको स्थिर सरकार देशको आवश्यकता रहेको बताए।
‘यसपटक कम्तीमा एकल बहुमतको सरकार बन्नुपर्छ। पाँच वर्ष स्थिर सरकार चल्छ, अनि कामले नै बोल्छ,’ उनको भनाइ थियो।
उनले मतदातासँग अरू कुनै माग नरहेको भन्दै नागरिकको विवेक र विचारकै जिम्मा जनताकै हातमा सुम्पिएको बताए।
