निर्वाचन आयोगले निर्वाचनसम्बन्धी मिथ्या तथा भ्रामक सूचना नियन्त्रण गर्न सक्रिय रूपमा काम गरिरहेको जनाएको छ।
आयोगकी सदस्य जानकीकुमारी तुलाधरले सामाजिक सञ्जालमार्फत फैलिने गलत सूचना, हेट स्पिच तथा भ्रामक सामग्री नियमन र नियन्त्रण गर्न आयोग सदैव सचेत रहेको बताइन्। यसका लागि आयोगले मेटा (फेसबुक, ह्वाट्स्याप) र टिकटकजस्ता सामाजिक सञ्जाल कम्पनीहरूसँग सम्झौता (एमओयू) गर्ने प्रक्रिया अघि बढाएको उनले जानकारी दिइन्।
उनका अनुसार फेसबुक, ह्वाट्स्याप र टिकटकमा देखिएका गलत तथा भ्रामक सूचनाहरू हटाउन सम्बन्धित कम्पनीहरूले सहयोग गरिरहेका छन्। साथै, मिथ्या सूचना नियन्त्रणका लागि नेपाल प्रहरीको साइबर ब्यूरोसँग समेत सहकार्य भइरहेको छ।
‘उपकरणसहितको साइबर ब्यूरोलाई आयोगमै राखिएको छ,’ उनले भनिन्, ‘मिथ्या सूचना नियमन र नियन्त्रण गर्न आयोग पूर्ण रूपमा सक्रिय छ।’
